Shillong, Naiwieng 03
U Myntri Khynnah ba khmih ïa ka tnat Agriculture & Farmers Welfare ka Sorkar Pdeng u Bhagirath Choudhary, ha ka Sngi Ba-ar u la pyntip ba kam shym la don kano-kano ka jingtyrwa ban kyntiew kyrdan ïa ka College of Agriculture ha Meghalaya sha ka skulbah (University).
Ïa kane, na ka liang jong u Myntri Khynnah u la pyntip haba jubab ïa ka unstarred question No.1195 ba la wanrah da u MP ka Shillong Dr. Ricky A.J Syngkon ha Parliament.
U Myntri u la pyntip “Na ka bynta ka Scientific Research bad ban kyrshan ïa ka rep ka riang bad kan kiew ha Jylla Meghalaya, ka Sorkar ka la buh ïa ka ICAR Research Complex for North Eastern Hills (NEH) Region, Umïam, 07 Krishi Vigyan Kendras (KVK) bad 03 tylli ki College (i) College of Post Graduate Studies in Agricultural Sciences, Barapani (ii) College of Community Science, Tura (iii) College of Agriculture, Kyrdemkulai.”
Shuwa kane, u Bhagirath u la pyntip ba ki don 3 tylli Central Agricultural University, 4 tylli ki Indian Council of Agricultural Research (ICAR) kiba la ibit ban long ki University, bad 4 tylli ki Centre University kiba ai jinghikai halor ka kam rep hynrei kam shym la don satia kano-kano ka jingtyrwa ban kyntiew kyrdan ïa kine kolej sha ki skulbah kiba pura.
Naba ka kam rep kynthup ka jingpule halor ka rep ka riang ka dei ka sobjek jong ka Jylla, kumta ka Sorkar Jylla ka lah ban kyntiew kyrdan lane plie ïa la ka Agricultural University bathymmai katkum ki jingdonkam ka Jylla na ka bynta ban ai jinghikai halor ka rep ka riang, ka jingwad bniah bad kiwei kiwei, la ong u Myntri.
