Shillong, Nohprah 03
Khnang ban nang pynkhlaiñ shuh shuh ïa ki nongrep ban rep khlem pyndonkam dawai sboh, ka Kynhun Myntri ka la ai jingmynjur ban thung ïa u Chief Administrative Officer (CAO) u ban peit ïa ka Meghalaya Natural & Organic Farming Society for Livelihood and Innovation in Agriculture (MNOFSLIA).
Ïa kane la mynjur ha ka jingïalang ka Kynhun Myntri kaba ka long ha ka Lah Sngi U Blei ha Secretariat.
Haba kren sha ki lad pathai khubor, u Bah Paul Lyngdoh u la ong ba la rai ban thung ïa u ophisar ka Meghalaya Agriculture Service (MAS) uba la shongthait, u Bah Macbul Lyngdoh Suiam kum u CAO ka MNOFSLIA na ka bynta lai snem.
Kum ban pynkynmaw, ka Sorkar Jylla ka la mynjur ïa Meghalaya State Organic and Natural Farming Policy ha ka 11 tarik Kyllalyngkot 2023 na ka bynta ban nang pynkhlaiñ ïa ka jingthmu ban rep ïa ki mar rep khlem pyndonkam dawai kum ka lad ban kyntiew shuh shuh ïa ka rukom rep khlem da pyndonkam ïa ki dawai bapher bapher.
Ïa ka MEGNOLIA la thaw ha ka 1 tarik Jylliew, 2023 bad ka bynta bakongsan ka MEGNOLIA ka long ban pyntreikam ïa ka Organic and Natural Farming Policy.
Kane ka kyrshan lang ruh ïa ki seng nongrep kiba dei ki Farmer Producer Organizations (FPOs) bad Farmer Producer Companies (FPCs) ban pynïaid ïew ïa ki mar ki mata ha ïew ha ka rukom kaba lah ban neh kham slem.
Ha kawei pat ka rai kaba la shim, la pyntip ruh ba ka Kynhun Myntri ka la mynjur ban thung ïa u Registrar cum Secretary ka Meghalaya State Consumer Dispute Redressal Commission (MSCDRC).
Shuh shuh ka kynhun Myntri ka la mynjur ban pynjlan ïa ka jingaiwai jaka ban plielad na ka nynta ki kam pynroi.
Ka jingpynjlan por ka dei na 30 snem sha 60 snem na ka bynta ki projek kiba dei ban bei pisa.
