Shillong, Nohprah 03
Ka jingjur jong ki kam tuh kam thiem na kawei ka sngi sha kawei pat ka la wanrah ka jingbym shngaiñ shuh ha ki liang baroh bad kaba la buh ïa ki trai ïing, trai kali ne wat ïa ki babu Sorkar hapdeng ka jingsyier ban ieh ïa la ki ïing ki sem, ki kali bad ophis treikam.
Katkum ka khubor na ki pulit la ong ba na ka liang u BDO ka Umling C&RD Block, Ri-Bhoi u la ujor ba ha ka 29 tarik mynshem bnai, la lap ba ki runar bym lah ban ithuh ki la prong jubor shapoh ka ophis jong ka Block bad ban rah tuh ïa kawei ka laptop.
Ha kawei pat ka khubor, ka Pinky Upadhaya ka la ujor sha ki pulit ba ha ka 30 tarik mynshem bnai, ki runar bym lah ban ithuh ki la prong jubor shapoh ka ïing jong ka kaba don ha Mawlai Nongkwar Block-IX, Shillong bad ban tuh ïa ka ksiar kaba shongdor kumba 1.7 lak tyngka.
Kumjuh na ka liang jong u Dr. K Patrick Pala u la ujor sha ki pulit ba hapdeng ka miet jong ka 29 bad 30 tarik Naiwieng, 2024, ki runar bym lah ban ithuh ki la prong tuh shapoh ka ïing jong u kaba don ha Quinton Road, Shillong bad ban rah tuh ïa ki tiar ki tar bad kiwei kiwei.
Haba phai pat sha ki kam shah tuh jong ki ar shaka, u Salman K Sangma u la ujor sha ki pulit ba ha ka 29 tarik mynshem bnai ha ka por kumba 4.15 dang step, ki runar bym lah ban ithuh ki la tuh ïa ka ar shaka jong u na Mendipathar ha North Garo Hills.
Kumjuh na ka liang jong u Habidul Islam u la ujor sha ki pulit ba ha ka 30 tarik mynshem bnai, ki runar bym lah ban ithuh ki la tuh ïa ka ar shaka jong u kaba don ïa u registration number AS34-3067 na ka thaiñ Boldamgre ha South West Garo Hills.
Ha kaba ïadei bad kane jingjia na ka liang jong ki pulit hadien ba ki la ïohpdiang ïa ki jingujor ki la pynïaid shakhmat ïa ka kam ban tohkit kumjuh ban thwet ïa ki briew kiba donkti ha kine ki kam tuh.
