Khliehriat, Nohprah 04
Ki don kumba 9528 ngut kiba ïoh ïa u khñiang jing -pang HIV/AIDS hapoh ka jylla Meghalaya, kynthup 2350 ngut tang na East Jaiñtia Hills District bad 3000 tam ha West Jaiñtia Hills District.
Ïa kane la pynpaw ha ka jingrakhe ïa ka World Aids Day ha East Jaiñtia Hills District ban pyni ïa ka jingkyrshan ïa ki briew kiba im bad shah ktah ha u khñiang jingpang HIV bad ban kynmaw ïa kito kiba la duh noh ïa la ka jong ka jingim na ka jingpang AIDS.
Ïa kane ka sngi la rakhe da ka Mihmyntdu Community Social Wel-fare Association (MCS WA) TI CC Khliehriat lyngba ka jingkyrshan ka Meghalaya AIDS Control Society Shillong ha Khliehriat West Community Hall ha ka 4 tarik Nohprah halor ka phang “Take the right path”.
U Aditya Verma Sub-Divisional Officer (SDO), Khliehriat kum u kongsan ha ka jingkren u la ong ka World AIDS Day ka dei ka sngi kaba kongsan ban pynsngewthuh ïa ki paidbah halor ka jingpang HIV/AIDS namar manla u briew u don ka hok ban ïoh ïa ka jingsumar kaba paka, ka jinghikai jingkyrshan khlem da leh shilliang khmat.
Ban pynduh jait ïa ka jingjyllei jong kane ka jingpang, u Aditya u la kyntu ïa ki nongïashim bynta ban hikai ïa ki paidbah ba kim dei ban kyntait ne ibeiñ, ñiew beiñ (discrimination and stigmatization) ïa ki briew kiba im ryngkat bad une u jingpang.
Nalorkata, u Aditya u la ïathuh ruh ïa ka buit treikam 95-95-95 kaba long ka thong jong ka UNAIDS ban pynthikna ba ha u snem 2030, 95% na baroh ki briew kiba im bad u HIV kin tip ïa ka jinglong HIV ka jong ki, 95% na baroh ki briew kiba la lap ba ki don ïa ka jingpang HIV kin ïoh ïa ka jingsumar kaba paka, bad 95% ban pynduh ïa u khñiang jingpang.
Kumta, u la pynshlur ïa ka tnat ka koit ka khiah ha ka distrik ban bteng ïa ka jingpyrshang ba khlem sangeh ha kaba ai ka jingshakri kaba paka sha ki paidbah bad u la khot ruh ïa ka jingïatreilang khnang ban lah ban pynduhjait suki suki ïa une u khñiang jingpang napoh ka distrik.
Kiwei kiba la ai jingkren ki kynthup ïa u District Medical &Health Officer, East Jaiñtia Hills District, Dr D Shylla, ka Medical & Health Officer In-charge Opioid Substitution Therapy, East Jaiñtia Hills District, Dr J Nongtdu, Medical & Health Officer In-charge Integrated Counselling and Testing Centre, East Jaiñtia Hills District, Dr D Nongpluh, Assistant Director (Social Protection & Mainstreaming) MACS, Shillong, Ajoy Lanong, bad Panel Lawyer DLSA, East Jaiñtia Hills District, PN Swer.
