Shillong, Nohprah 04
Ka Committee kaba khlieh da u nongbishar ba la shongthait u Justice BP Katakey u la ai jingmut ban pyntreikam noh mar-mar ïa ka rai ban leh da ka ‘Aerial Survey’ ban lap ïa ki jaka tih dewïong beaiñ shabar naba don ki jaka pynlang dewïong.
U Justice Katakey u la pynpaw ïa kane ha ka 26th interim report kaba la phah sha ka Meghalaya High Court.
La ong ba donkam ban leh ïa ka ‘Aerial Survey’ lane ka jingpeit bniah kaba ïaid najrong ïa ki jaka pynlang dewïong kiba la buh da ka Coal India Limited, bad ban wad katno u don dewïong kham palat ban ïa u dewïong uba la don lypa ha ki jaka pynlang dewïong nalor u dewïong uba la ïoh kurup katkum ki kyndon ka Mines and Minerals (Development and Regulation) Act, 1957 (MMDR, Act, 1957).
Ka Committee ka la ong ruh lada lap ïa u dewïong ba tih beaiñ, dei ban kurup bad leh eiei katkum ki kyndon aiñ hapoh ka MMDR Act, 1957. Kumta ka Sorkar Jylla ka la rai ban leh ïa ka ‘Aerial Survey’ ha ki district kiba pynmih dewïong jong ka jylla.
