Shillong, Nohprah 04
Ka Sorkar Assam ha ka Sngi Balang ka la rai ban khang kdam syndon ïa ka jingbam doh masi ym shuh tang 5 km jngai na ki Mandir hynrei wat ha ki hotel, restaurant bad jaka paidbah kumjuh.
Haba kren sha ki lad pathai khubor hadien ba la wai ka jingïalang jong ka Kynhun Myntri ka Sorkar, u Myntri Rangbah ka Jylla Assam u Himanta Biswa Sarma u la pyntip ba kum ka kynhun Myntri ka la rai ban khang noh ïa ka jingbam doh masi ha ki jaka paidbah kum ha ki hotel, restaurant lane ki jingbam khawai paidbah bad ïa kane ka rai la shim kum shi bynta ban pynkhlaiñ ïa ka aiñ Assam Cattle Preserva-tion Act, 2021.
U Himanta u la pyntip ruh ba ka kynhun Myntri ka la mynjur ban khang bam doh masi ïa ki paidbah la ki long ha ki hotel, restaurant, ki jingïalang paidbah bad kiwei kiwei.
Shuh shuh u Himanta u la ong, ka aiñ kaba don mynta halor ka bam doh masi ka long kaba khlaiñ hynrei kam shym la don pat ka jingkhang ïa ka bam doh masi ha ki restaurants, hotels, bad ki jaka mane blei lane ha ki jingïalang paidbah haduh mynta.
“Mynta, ngi la shim ïa ka rai ban pynlong shuh shuh ïa kane ka aiñ kaba khlaiñ, ban khang kdam syndon ïa ka jingbam doh masi ha ki jaka paidbah kumjuh ha jylla Assam,” u la ong.
Shuh shuh ha kane ka sngi na ka liang ka kynhun Myntri jong ka Sorkar Assam ka la ïakren ruh halor ka jingpynsuk ïa ka leit ka wan kaba khlem don jingeh jong ki paidbah sha ka kad liengsuiñ jong ka LGBI ha kaba u la ong ba ka kad liengsuiñ jong ka LGBI la antad ba kan sdang treikam noh shen kaba lah ban kit ïa ki nongleit nongwan kiba don palat 13 million ngut ha ka shisnem bad ka Sorkar Assam ka la dep shimkhia ruh na ka bynta ban pynbha ïa ki surok kiba naduh ka lad VIP shaduh Dharapur.
