Shillong, Nohprah 04
U Nongïalam ka Liang Pyrshah, Dr. Mukul M Sangma u la ong ba ki pulit kim dei ban long ka jingsyier ka jingtieng ïa ki paidbah ne ban ïashah ïa kiba don ha ka bor.
Haba kren ha ka Sngi Balang hadien ba la wai ka jingïalang ka State Security Commission (SSC), u Dr. Mukul u la ban jur ïa ka jingdonkam ban pynkhlaiñ ïa ki rukom treikam ki Pulit ha ka Jylla katkum ki kyndon aiñ.
U la ong ba ka jingtuklar ki briew kiba don ha ka bor ban pyndonkam ïa ka tnat pulit, kam long kaba bha.
“Ka tnat pulit kam dei ban shah pynjngut ne ban leh shiliang ïa kiba don ha ka bor hynrei ka dei ban ïaid katkum ka aiñ. Wat la ka thong ka dei ban pynkhlaiñ ïa ka rukom treikam ki pulit katkum ka aiñ, hynrei ki don beit ki mawjynthut kiba wan kum ka jingshah ïalam bakla ha ki bor ba halor bad ha ki briew kiba don ha ka Sorkar”, u la ong.
U Dr. Mukul u la ong ba ki pulit kim dei ruh ban shah riam ban leh ïa kano-kano ka kam be-aiñ namar kan wanrah ïa kaba sniew ka ban pynlong ïa ki paidbah ban artatien ïa ka rukom treikam jong ki pulit.
U la ïathuh ba ha ka jingïalang ka SSC la ïathir sani na ka bynta ban pyndonkam hok ïa ki jingdon-jingem bad ka bor jong ki pulit kumba la bthah ha ka Meghalaya State Police Act 2010.
U Dr. Mukul u la ïathuh ba ki don shibun ki mat jingïakren ha ka State Security Commission, hynrei kaba kham kongsan ka dei kumno ban pynkhlaiñ ïa ka tnat Pulit katkum ki kyndon aiñ, ban wanrah ka jingshong shngaiñ bad ban tem ïa ki kam sniew hapoh ka Jylla.
Nalor kane, une Nongïalam ka Liang Pyrshah u la ïathuh ba u la ai jingmut ha ka State Security Commission ban pynthikna ba ka jingthep kam Pulit kam dei ban slem khnang ban lah pyndap ïa ki kam ba lait, khnang ban pynkhlaiñ ïa ki kam kumba la bynshet.
“Nga la ong ïa ki ba ka jingthung kam pulit ruh ka dei ban long man la u snem namar bun ki kam ki thylli, hadien ba don ki pulit kiba la kiew kyrdan bad kiba la shongthait na ka kam”, la ong u Dr Mukul.
U la ong ba bun ki Thanat, ki Police Outpost bad kiwei ki shlem ka tnat Pulit ki duna nongtrei bad kane ka dei kawei na ki daw ba tlot ka rukom treikam.
Katkum ka jingong u Dr. Mukul, na ka 100%, bun ki Thanat, ki Police Outpost ki don briew bad ki treikam tang 50% haduh 60%. Ka jingduna briew ka pyntlot ïa ka rukom treikam bad ïa kane la sakhi lyngba ka jingshah thombor jong katto-katne ki Thanat ha Rilum Khasi-Jaiñtia.
U Myntri Rangbah ka Jylla, Conrad K Sangma ha ka Sngi Balang u la khot ïa ka jingïalang jong ka State Security Commission (SSC) ha kaba u Dr. Mukul kum u Nongïalam ka Liang Pyrshah u la long kum dkhot, kynthup ruh u Symbud Myntri Rangbah ba khmih ïa ka Kam Pohïing (Police), Bah Prestone Tynsong, u Chief Secretary ka Jylla bad ka Director General of Police (DGP).
