Ki kam tuh kam thiem napoh ki ïing ki sem, ki dukan bad ruh ka jingtuh ïa ki ar shaka, ki kali bad kiwei-kiwei ki tiar ki la kynrei shaba palat khamtam ha sor Shillong. Ka jingjur jong kine ki kam tuh ka la paw ruh lyngba ki jingujor kaba ki pulit ki ïohpdiang man la ka sngi na ki ‘riew paidbah hadien ba ki la shah rong noh ka ar shaka ne lada don kiba shah prong ki ïing ne kito kiba shah kyndang ïa ki dukan. Lah ban sngewthuh ruh ba kine ki kam tuh ki dei tang kiba paw hynrei katno shuh kiwei ki kam tuh pat ki bym paw pyrthei. Mano kita kiba tuh bad balei ki tuh? Ka jingjyllei jong ki kam tuh kam thiem ym tangba ka wanrah ïa ka jingduhnong ïa kito kiba ngat ha kane apot hynrei ka weng ruh ïa ka jinglong shngaiñ ha ka shnong ka thaw ba kum ki briew kim nud ne sngewthuh shuh ïano ban shaniah. Ka long shisha kaba sngewtriem ban pyrkhat ïa ka jingbun jong ki nongtuh khamtam ha kine ki por mynta.
Ki briew kiba ngat ha kane ka apot ki dei kiba kamai shitom. Ki da theh ka syep ka syar ban pynlang pisa shitom ban thied kali ne ar shaka ne ‘Mobile Phone’ ne ‘Laptop’ bad ter-ter. Hynrei tang shi khyllipmat, kata ka jingtrei shitom baroh ka kylla lehnohei namar ki nongtuh. Kumba ngi tip, ki don bun ki briew kiba thied kali ne ar shaka da kaba siew man la u bnai lane kata ka ‘Easy Monthly Installment’ (EMI). Man la u bnai ki shah khate na ka jaka kynshew pisa jong ki tad haduh ba kin da lah ban pynkhuid lut ïa ka pisa kaba ki dei ban siew. Ki thied kali lane ar shaka na ka bynta ban suk ha ka leit ka wan ha kane ka pyrthei ïa beh kam ïa beh jam. Ym baroh kiba don pisa ban shu thied nakot ïa ki kali, ar shaka bad kiwei-kiwei tiar. Ki dei ki mar kiba rem bad kiba hap ban sumar bha. Hynrei wat lada ki phikir ruh, ka jingdon jong ki nongtuh kiba shyrkhei ka pynbijai lut ïa ka jingkamai shitom jong ki. Tang kiba la mad kin sngewthuh ïa ka jingkthang ka mynsiem haba ïa ka umsyep jong ki la pynlong lehnohei noh kha-ma-kha da ki nonglute.
Na ka liang ki bor pulit ki ju pynbna ïar bad mana ïa ki paidbah ba kim dei ban thied kulmar ïa ki tiar ki tar pateng khamtam ki kali, ar shaka, ‘Mobile Phone’, ‘Laptop’ bad kiwei-kiwei namar ki lah ban dei ki mar ki mata kiba shu tuh nangno-nangno. Kane ka long kaba donkam ïa ki paidbah ban sngewthuh. Lada ki thied kulmar ïa ki mar ki mata khlem da tip ïa ka tynrai tang namar ba ki ïoh ha ka dor kaba tad, ki lah ban ngat jingeh hadien-habud. Uba tuh bad uba die u la ïoh la ka pisa bad u la kmen. Hynrei kito kiba la thied ïa kita ki tiar ki tar ki lah ban babe kylla. Ha ka pyrthei mynta, ki don ki kor ki bor kiba lah ban wad ïa ki tiar ki tar kiba jah khamtam ki ‘Mobile Phone’ bad ‘Laptop’. Ka lah ban shimpor, tangba lada trei dukhi ki pulit, kin lap beit shaei kata ka mar ba shah tuh ka la poi. Namarkata, ki paidbah ki dei ban long kiba husiar. Lada don kiba wan tyrwa die ïa ki mar ki mata, da kylli pyrthew bniah shwa ban kner ïa la ki kti.
Ha kaba ïadei bad ki nongtuh, bunsien ki pulit kim ju kham lapdien mano kiba donkti. Ngim tip na kaei ka daw ba ki pulit ki shem jingeh ban thwet ïa kiba tuh ba thiem. Lehse ki pulit ki don da kiwei pat ki kam kiba kham kongsan ban tohkit. Hynrei lada ka jingtohkit ka tlot, lada kiba tuh kim shah pynsaja, kan long kum ka jingai mynsiem ïa kiwei pat ban ïa sdang leit prong sha ïing briew ban kit ïa ki mar ki mata katba ïoh ei. Ka jingbym lah ban leh eiei ka pynshlur ïa kiwei ban ïa kyrsum lang ha kajuh ka ahor namar ki tip shai ba kam dei kaba suk ban thwet ïa ki. Nangne, kin sa mih pat sa kiwei ki jingeh. Bunsien kiei-kiei ki sdang shwa na ki barit-baria shwa ba kin pur bad heh bad san sa sha ki kam kiba kham shyrkhei. Na ka liang ki paidbah, kin hap ban kham long kiba husiar bad ban shim hi ïa ki lad ki lynti ban ïada na ka jingshah prong bad shah tuh shah thiem. Ki Dorbar Shnong ki dei ruh ban ïa peitngor lem ha ki shnong ki thaw lade ban wanrah ïa ka shongsuk-shongsaiñ bad ka jingshngaiñ.
