Shillong, Naiwieng 19
Namar ka jingsngewkhia haba ïadei ki jingsniew kiba ki mih ha kine ki sngi namar ka jingjyllei u drok ha ka Jylla, ka Seng Kur Shylla, East Khasi Hills ka la shim ïa ka sienjam ban pynphriang jingtip ïa ki jingma u drok, kaba la pynlong da ka Food Fest cum Winter Sale ha Madan Ïewrynghep Laitumkhrah, Shillong.
Ha ka sngi sdang jong katei ka tamasa, la wan ban long kongsan ban plie paidbah ïa katei ka Food Fest cum Winter Sale da u Myntri Sorkar u Bah Wailadmiki Shylla, ha ka jingdonlang u Bah Pyrkhat Shylla kum u Symbud Kongsan u ba dei ruh u President ka Sengkur Shylla Khasi Jaiñtia bad la ïadonlang u Bah Mawsiang Shylla President ka Seng Kur Shylla, East Khasi Hills, ka Kong Joplyn S. Shylla, General Secretary Seng Kur Shylla, East Khasi Hills bad kiwei-kiwei.
Ki la don haduh 40 tylli ki dukan (Stall) kiba wan ban die ïa ki jingbam tynrai, ki tiar thaiñ kti, ki jaiñ ryndia ba thaiñ na u skum khñiang ryndia, ki wine ba na ki soh bapher-bapher kynthup ki dukan jaiñ lem kiwei-kiwei de ki mar ba la wanrah na ki dong ki thaiñ bapher-bapher jong ka Jylla.
Haba ai jingkren u Bah Wailadmiki u la ai ka jingïaroh ïa ka Seng Kur kaba la don ïa ka jingsngewkhia ban pynlong kum kane ka jingpynsngewthuh paidbah haba ïadei ka jingma u drok ïa ki khun samla bad kaba la paw ha kine ki sngi kiba bun ki khun samla ki la ngop ha une u jingdih ba sniew.
U la ong ba ha ka Jylla Meghalaya 52% na ka jingkheiñ bun briew, ki dei khynnah samla kiba don hapoh 20 snem ka rta, namar kata ka jingpynsngewthuh ïa ka jingma u drok ka long kaba donkam haduh katta-katta.
Ha kajuh ka por u la kdew ruh ba kane ka jingai jinghikai lane ka jingpynsngewthuh ïa ka jingma u drok ka la dei ka por ba ki kmie ki kpa ruh kin shim jingkitkhlieh ban peit ban syndong bha ïa la ki jong ki khun, namar ka pyrthei mynta ki la bun palat ki jingsniew kiba wan ban pynshoi ïa ki khynnah samla.
Na ka liang u Bah Pyrkhat haba ai jingkren u la pynpaw ka jingsngewkhia haba ïadei kine ki sngi, ba bun ki khun samla ki mad ka jingkyrduhkam bad kaba pynlong ïa ki ban shah ïalam bakla bad ba ki ngop ha u drok.
Shuh-shuh u la ong ki kmie ki kpa ki duh thiah duh dem hadien ba ki la pynlut spah ban pynnang pynstad ïa ki khun jong ki haba ki la dep ïa ki jingpule kim ïohkam ïoh jam, u la ong ki kam ki bun ha ka Jylla, hynrei kiba bun ki khun samla kim treh ban trei namar ba ki kwah ban trei tang ki kam kiba suk.
U la kyntu ba ki samla kim dei ban lehraiñ ban trei ïa kano-kano ka kam, namar ka jingdon ha ki kam ki jam ka long kawei na ki lad ba ki khun samla ki lah ban kiar na kita ki jingsniew kiba ker sawdong ïa ki.
Haba bynrap u Bah Pyrkhat u la ong ba na ka liang ka Seng Kur Shylla kan sa shong jingïalang ban pyrkhat bha haba ïadei kumno ban ïaleh ban ïakhun ïa ki jingsniew kiba wan ap thap ïa ki khun samla khnang ba ka jingpyrshang barit jong ki kan long kaba jop haba ïadei ban wahrah jingbha ïa ka imlang ka sahlang.