Bym don ki ben, ha madan hap shong ki khynnah ka skul Pyndensohsham

Mawkyrwat, Naiwieng 19 Ka long kaei-kaei kaba sngew sangsot ïa ki khynnah kiba thrang ban ïoh ïa ka jingnang jingstad lada kita ki jingdonkam kiba kongsan ba dei ban don ha ki skul kim biang...

Mawkyrwat, Naiwieng 19

Ka long kaei-kaei kaba sngew sangsot ïa ki khynnah kiba thrang ban ïoh ïa ka jingnang jingstad lada kita ki jingdonkam kiba kongsan ba dei ban don ha ki skul kim biang satia haduh ba ki khynnah ki hap ban shong ha madan tang ban ïoh ïa ki jinghikai.

Kane ka la paw ha kawei na ki skul ha Pyndensohsham Govt. Lower Primary kaba don hapoh ka shnong Pyndensohsham, Ranikor C&RD Block ha South West Khasi Hills District, ha kaba ki khynnah kiba leit ha kane ka skul kim shym la ïoh ïa ki jingdonkam kumba ïoh lang kiwei ki para khynnah skul namar ki khynnah kiba pule naduh ka class 1 haduh class V ki hap ban shong ha madan ban pule ban thoh ïa ki jingthoh jong ki namar ka jingbym don ki ben bad ki miej.

Kaba kham isangsot shuh shuh ïa ki khynnah kiba pule ha kane ka skul ka long ha ka por lyiur ryngkat ka jingkhriat bad jingjhieh jong ki jaiñ, kim banse ban shong la ka shong hapoh madan.

Watla na ka liang ka building ka la biang ha kane ka skul naba ka la ïoh ïa ka building thymmai hynrei ki dang don pat shibun ki jingduna hapoh kane ka skul naduh ki ben ki miej, ka ïing shet, ka jaka leit shabar, ka um bad ka bording kaba ki khynnah skul ki donkam eh.

La ïoh ban ïakren ruh bad ka nonghikai jong kane ka skul kaba la ïathuh ïa bun ki jingduna hapoh kane ka skul bad ka la bynrap ruh ba ka jingbym don jong ki ben ban shong ka la wanrah jingeh jingjynjar ïa ka jingpule ym tang ïa ki khynnah hynrei ïa ki nonghikai ruh.

Ha kaba ïadei bad kane na ka liang ka Hynñiewtrep National Youth Front (HNYF) South West Khasi Hills District hapoh ka jingïalam u Bah Shainingstar Wanniang, President ryngkat ki dkhot hadien ka jingud jingnam jong ki kmie ki kpa ha ka 18 tarik u Naiwieng, 2026 ki la leit jurip ïa kane ka skul bad ha kaba ki la sakhi da la ki jong ki khmat ba ki khynnah ki hap ban shong ha madan man ka sngi ha ka por long skul.

Kumta ka HNYF ka kyrpad ïa ka Sorkar ba ka dei ban shimkhia ban pynbiang noh ïa ki jingdonkam baroh hapoh kane ka skul, khnang ba kane ka skul kan lah shisha ban ai ka jingshakri kaba bha ïa ki khynnah ka dong ka thaiñ.