380 tylli ki kuli MMG ïoh kurup ki pulit na khlaw ha Rapdikgre

Shillong, Naiwieng 19 Ki pulit ka East Garo Hills kila ïoh ban kurup noh haduh 380 tylli ki kuli Medium Machine Gun (MMG) bym pat pyndonkam, ba la buhrieh ha ka jaka khlaw ka shnong...

Shillong, Naiwieng 19

Ki pulit ka East Garo Hills kila ïoh ban kurup noh haduh 380 tylli ki kuli Medium Machine Gun (MMG) bym pat pyndonkam, ba la buhrieh ha ka jaka khlaw ka shnong Rapdikgre, kaba hap hapoh ka thanad Williamnagar.

Ka kyrwoh ba la pyllait da u Superintendent of Police (SP) ka East Garo Hills u Pawar Swapnil Vasantrao ha ka sngi Palei, ka ïathuh ba ïa kane ka jingkurup la lah ban leh da ka jingïoh ïa ka jingtip ba thikna ha ka 18 tarik Naiwieng, halor ka jingdon bun bah ki kuli bala buhrieh da ki briew bym lah ban ithuh ha ka khlaw ha shnong Rapdikgre.

U SP u la ong, “Haba shimkhia ïa ki khubor ba ïoh, ki pulit kila pynlong ïa ka jingkhynra ha katei ka thaiñ, bad kila lap ïa 380 tylli ki kuli MMG bym pat pyndonkam bad la kurup noh ïa ki.”

Ki pulit ki ïathuh ba ïa kine ki kuli la buhrieh ha ki 5 tylli ki tin umphniang bam, ïa kaba la suba jur bala buhrieh da ki briew ki bym lah satia ban tip.

Halor kane ka jingïoh kurup, ki pulit kila register ïa ka ejahar hapoh ka thanad Williamnagar hapoh ka kyndon 25(1A)(1B) jong ka Arms Act, khnang ban lah pynlong ïa ka jingtohkit kaba bniah halor kane ka kam bad ban lapdien ïa kiei-kiei baroh ha lyndet kane ka jingbuhrieh ïa kine ki kuli.

Ki pulit kila kyrpad ïa ki paidbah ba kin ïai long kiba peit pyrman bad pyntip mar mar ïa kino-kino ki jingtip kiba donkam haba ïadei bad ka jingdon ne buhrieh ïa ki tiar siat ne kuli lane kino-kino ki kam ba ishankhmat sha ki thanad ba marjan.