42 tylli ki Transport Service la lah ban leh online, ym donkam ïenglaiñ ha DTO

Shillong, Naiwieng 19 Kiba kwah ban pynthymmai ïa ki lisen, pynkylla ïa ka hok longtrai ïa ki kali, lane siew ïa ka traffic challan ha Jylla, kim donkam shuh ban hap leit ïenglaiñ sha ki...

Shillong, Naiwieng 19

Kiba kwah ban pynthymmai ïa ki lisen, pynkylla ïa ka hok longtrai ïa ki kali, lane siew ïa ka traffic challan ha Jylla, kim donkam shuh ban hap leit ïenglaiñ sha ki ophis jong ki District Transport Officer (DTO), namar mynta haduh 42 tylli ki Transport Service, la lah ban shu leh online.

U Myntri Rangbah ka Jylla, u Conrad K. Sangma ha ka sngi Palei u la pyllait paidbah ïa ka thup jong ki jingshakri da ki kor digital, kaba la buh ïa 42 tylli ki jingshakri kam kali, ban shu leh online, wanrah ïa ka challan ha baroh kawei ka Jylla, plie ïa ka online portal na ka bynta ki ‘subsidy’ jong ki kali ilektrik, bad wanrah ïa ka SaveLIFE Foundation ban ïarap pynduna ïa ka jingïap ha ki surok.

Ka bynta kaba kongsan jong kane ka long ka Digital Transport Citizen Service bad e-Challan System, kaba la shna ha ka platform VAHAN bad SARATHI jong ka Sorkar India.

Na ki 42 tylli ki jingshakri kiba la pynlong digital, 30 tylli ki dei ki jingshakri kiba ïadei bad ki kali hapoh ka VAVAN, katba 12 tylli kidei ki kam kiba ïadei bad ka Driving Licence hapoh ka SARATHI. Haduh 26 tylli kidei ki jingshakri kiba thymmai kiba lah ban leh online, katba 16 tylli ki jingshakri kiba la don lypa la pynrung lang hapoh kawei ka rukom treikam digital

Kane ka mut ba ki paidbah mynta ki lah ban aplai online na ka bynta ka jingpynkylla trai kali, NOC, ka jingpynthymmai ïa ka RC, ki Certificate Fitness, jingsiew ïa ka vehicle tax, ki permit, Learner’s Licence, ka jingai bad pynthymmai ïa ka Driving Licence, ka duplicate licence bad ka International Driving Permit bad ki lah ruh ban buddien ïa ki aplikeshon haduh ban ïoh ïa ki.

“Ka Digital Transport Citizen Service bad e-Challan System kan pynlong ïa ki jingshakri kiba ïadei bad ka transport kiba kham suk ban ïoh, kiba kham treikam bha bad kiba kham pynsuk ïa ki paidbah, ha kajuh ka por kin wanrah ïa ka jingtreikam kaba shai bad ba don ka jingkitkhlieh,” la ong u Conrad.

Ki paidbah ki lah ban ïoh ïa kine ki jingshakri lyngba ka website jong ka Department of Transport and Civil Aviation, ki portal VAHAN bad SARATHI, ka mParivahan app, bad lyngba ki Common Service Centres kiba don ha kylleng ka Jylla.

Ka jingpyntreikam ïa ki aiñ ruh mynta la pynlong digital. Ka tnad ka la buh ruh ïa 50 tylli ki Point-of-Sale (POS) device ha ki District Transport Officer (DTO) bad Motor Vehicle Inspectors (MVI) ba kin ai ïa ki e-Challan ha ka por ba donkam bad ban siew ïa ki kuna khlem da pyndonkam pisa. Ki paidbah ki lah ban peit bad siew ïa ki challan online, bad ban ujor ïa ki jingeh lyngba ka online grievance redressal system.

Ha kajuh ka por, u Myntri Rangbah u la plie ïa ka Online Application Portal EV Subsidies hapoh ka Meghalaya Electric Vehicle policy 2026.

“Ka Online Application Portal na ka bynta ka EV Subsidies, kan pynlah ïa ki paidbah ban aplai ïa ka subsidy jong ki kali electric, da kaba leh online ha ka rukom kaba suk, kaba pynsuk ïa ka jingpynïaid ïa ki application bad ka ban pynshlur ïa ka jingpyndonkam kham bun ïa ki kali electric,” u la ong.

Ki nongthied kali electric kin ïoh ïa ka jingïarap pisa kaba T.25,000, ryngkat bad ka jingpyllait na ka jingsiew ïa ka vehicle registration fee.

“Da ka jingïarap pisa kaba T.25,000 ïa ki nongthied EV bad ka jingpyllait na ka jingsiew ïa ka vehicle registration fee, ngi pyrshang ban pynlong ïa Meghalaya kaba kham khuid, kham jyrngam bad ka Jylla kaba lah ban neh,” ong u Conrad.

Ka jingpynbna kaba lai kadei ka jingïateh soskular (MoU) bad ka SaveLIFE Foundation ban pynkhlaiñ ïa ka jingshngaiñ ha ki surok lyngba ka jingpynsngewthuh paidbah, ka jingpynkhlaiñ ïa ki bor treikam, ka jingpyntreikam ïa ki sienjam kiba pynshong nongrim ha ki sakhi bad ki jingtip kiba thikna.

“Ka thong jong ngi ka long ban pynduna ïa ki aksiden kali ha surok, ban ïada ïa ki jingim briew bad ban pynsngewthuh ïa ki paidbah ba kin pyndonkam ïa ka surok da ka jingkitkhlieh ha kylleng ka Meghalaya,” la bynrap u Conrad Sangma.