Shillong, Naiwieng 19
Ki nonghikai ka Khasi Jaiñtia Deficit School Teachers Association (KJDSTA) na Smit Zone ki la pynlong ka jingïakhih da kaba shongkyllaiñ mungor ha Madan Lad Nongkrem, Kynton U Mon ryngkat ka jingrah da ki plakad, ban pynrem ïa ka Sorkar bad ka jingkren u Symbud Myntri Rangbah ka Jylla pyrshah ïa ki nonghikai.
Ka jingïakhih ki nonghikai deficit ka dangïai bteng, ha kaba la sakhi ba ha la ki jong ki jong ki Zone, ki nonghikai ki la ïeng ban ïakhih bad ban pynrem jur khamtam ïa ka jingkren u Bah Prestone Tynsong.
Ha ki plakad ba ki nonghikai na Smit Zone ki rah, ki la thoh ryngkat ki kyntien ba ong ‘Ngim dei ki ‘kruiñ’ bad ngim dei ki ‘sohpyut’, bad kiwei-kiwei de ki jingthoh pynrem ïa ka Sorkar.
Haba kren sha ki lad pathai khubor u Bah T.Thangkhiew, President KJDSTA Smit Zone u la ong ba ka pynsat ïa ki nonghikai namar ka Sorkar ha ka jaka ba kan pyntreikam ïa ka Draft Scheme 2023, hynrei ka ka pyntreikam kylla da ka skhim 2026.
U la pynsngew sha ka Sorkar, ba kane ka jingïakhih jong ki, kam dei ba tang mynta hynrei naduh u snem ba la dep ki la pynsngew ha ka Sorkar ïa ki jingdawa, hynrei haduh mynta kine ki jingdawa kim pat urlong.
“Ka jingïakhih jong ngi ka long ban dawa na ka Sorkar ba ka dei ban pyllait noh ïa ka DA arrear, ka jingbym pyntreikam ïa ka Centralized Provident Fund kaba 10 percent, ki jingsiew ba sahteng, ka NPS, bad kiwei kiwei de ki mat jingdawa,” u la ong.
“Ka Sorkar ka dei ban sngap ïa kane ka jingdawa jong ngi,” u la bynrap.
“Ka Sorkar ka la kular ba kan sa ai noh ïa kine ki jingdawa hashuwa ban poi ka Puja, hynrei mynta la jan poi sa ka Khrismas kata ka jingkular kam pat urlong,” u la ong.
U la ïathuh ba lyngba kine ki jingdawa ka seng ka la dep ïaid ban ïakren bad phah lyngba ki jingthoh sha ka Sorkar, “Ngi la dep ban ïakynduh ïa u Commissioner & Secretary ka tnad pule puthi, ngi la phah ki dorkhas sha u Myntri Rangbah ka Jylla, hynrei kaba sah lyngngoh ka long ba kine ki jingdawa kim shym la pat urlong haduh mynta.
“Kane ka dei ka ri synshar paidbah, lada ngim mih bad ïakhih da kaei pat ka lynti ba ngin shim?” la ong u Bah T.Thangkhiew.
Kumta u la kyrpad ïa ka Sorkar ba kan sngewbha ban sngap bad ai noh ïa kine ki jingdawa ki nonghikai, da kaba ong ba lada ka Sorkar kam ai ïa kine ki jingdawa ki nonghikai, ka jingïakhih kan dang bteng.