Shillong, Nohprah 04
U Nongïalam ka All India Trinamool Congress (AITC) ha ka Jylla, u Dr. Mukul M Sangma u la ong ba lada kam dei na ka ilekshon shiteng samoi ka NPP kan ym jop na Gambegre.
U la ong ba ka jingjop jong ka NPP ha ka ilekshon shiteng samoi na Gambegre ka dei da kaba pyndonkam bakla ïa ka bor da kiba don ha ka Sorkar ban pynbiej ïa u paidbah.
“Lada kam dei ka ilekshon shiteng samoi ngi la jop”, la ong biang u Dr Mukul.
Une Nongïalam ka TMC u la kyntait ba ka la don ka jingduna ne bakla na ka seng kaba la pynlong ban shah rem ha ka ilekshon, pynban u la ong ba la dei ban wad ha kano ka rukom ka shah rem.
U Dr. Mukul u la kynnoh ba ha ka jingpynkhreh ïa ka ilekshon la ïohi ïa ka jingsam tin, sam kiei-kiei ki jingai ban pynbiej ïa u paidbah.
U la ong ba lada tih bniah ïa kaei kaba jia ha ka por ilekshon, yn tip lut kumno la pyndonkam bakla ïa ka bor bad kiwei ki kam pynbiej ïa u paidbah, kiba lah ban pynkylla syndon ïa ka jingmih na ka jingjied.
U la ong ba ha ka synshar paidbah ka jingkylla jong ka saiñpyrthei ka ïai jia.
“Kaei kaba ïohi arphew snem mynshwa bad kaei kaba phi ïohi mynta, ka jingkylla ha ka jingjied nongmihkhmat ka dei da ka jingpynbiej har rukom bad ki seng saiñpyrthei ki shim kabu ban ïoh ïa ka jingjop”, la ong u Dr Mukul.
Lah ban kdew ba ha ka ilekshon shiteng samoi ba dang shu dep ha Gambegre, ka kyrtong jong ka NPP, ka Dr Mehtab Chandee A Sangma ka la jop da kaba ïoh 12678 vote bad tam ïa ka kyrtong jong ka TMC, ka Sadhiarani Sangma kaba wan ba-ar da 4594 vote, katba ka Congress kaba ju bat ïa katei ka konstitwensi ka la wan balai.
