Shillong, Nohprah 04
U MDC ba mynta ka National People’s Party (NPP) na Nongspung-Sohïong konstitwensi Bah Sherbor L Mawlong u lah ban duh tiket ha kane ka ilekshon MDC sha ka Khasi Hills Autonomous District Council (KHADC) hadien ba ki nongkitkam jong ka NPP Sohïong Block, East Khasi Hills District kim shym la lah ban rai haba don sa ar ngut ki nongkitkam kiba pan tiket.
Katkum ki khubor ba la ïoh lum la ïathuh ba nalor u MDC mynta u Bah Sherbor Mawlong uba la pan tiket, ki la don sa ar ngut ki nongkitkam kiba hakhmat jong ka NPP kiba la pan tiket lang kiba kynthup ïa u Bah Phlamon Kharmyndai bad u Bah Badon Dohtdong na bynta ban ïakhun ïa ka ilekshon MDC na Nongspung-Sohïong konstitwensi.
Ki khubor kiba la ïoh lum la ïathuh ba ha ka jingïalang jong ka Sohïong Block la shim ïa ka rai ban phah lang ïa baroh lai ngut ki kyrteng sha ka NPP East Khasi Hills District namar kim shym la lah ban rai. Kumjuh ka District Committee ruh kam lah ban shim rai bad ka la phah ïa baroh lai ngut ki kyrteng sha u Bah Prestone Tynsong uba dei u President ka NPP ha Meghalaya.
Ki khubor ki la ïathuh ba ka shong sa ha ka rai jong u Bah Prestone Tynsong bad ki nongkitkam ka NPP Meghalaya ba kin shim ïa ka rai la kin pynduh tiket noh ïa u MDC ba mynta Bah Sherbor Mawlong ne kin ai tiket biang.
Shuh shuh ki khubor ki ïathuh ba lada ka NPP ka ai tiket biang ïa ki MDC tang ha ki nongkitkam jong ka Block ki la dep pynthikna ïa ka tiket ban phah tang kawei ka kyrteng sha ka District bad State Level hynrei shisien bym lah ban rai na ka Block la sngewthuh ba u MDC u lah ban duh tiket.
Kum ban shu pynkynmaw u Bah Sherborlang Mawlong u la jop ïa ka MDC ha u snem 2019 na ka seng HSPDP. Hadien pat u la ïasoh noh sha ka NPP namar u MLA barim Bah Samlin Malngiang u la pynïasoh sha ka NPP ban ïakhun na ka tiket NPP ha Sohïong konstitwensi.
Ha Sohïong konstitwensi kiba la pynthikna ïa ka tiket ïa u kyrtong dei tang ka Voice of the People Party (VPP) namar ki la dep pynbna ïa ka kyrteng jong u Bah Banpyrkhat Nongrang.
