Shillong, Nohprah 04
Ha kawei ka jingjia kaba la jia ha ka por kumba 1:30 nohphai sngi ka 4 tarik u Nohprah 2024, ha kaba uwei u post nar uba pynïasoh ïa ki waïar bording ilektrik u la khyllem kynsan bad leit ban ïa kawei ka Bolero Pickup kaba don ïa u registration nombar ML10-B-6914 bad ha kane ka jingjia, ka khlem don satia kano-kano ka jingmynsaw.
Ka dawbah jong ka jingkhyllem une u post nar ilektrik ka dei namar ka jingbam sarang kat haduh um lah shuh ban kyrshan. Une u post u dei uba don hajan jong ka sem ap bos kaba don ha Golf Club.
Ha ka jingban ïa katei ka Bolero Pickup, wat la ka khlem shym la don kano-kano ka jingmynsaw hynrei hapoh katei ka kali, ki la don 2 ngut ki briew kiba dang khreh ban mih na katei ka jaka da katei kajuh kali bad kiba la lait thaw na kane ka jingjia.
Katkum ka jingïathuh jong u nongñiah ka kali, u la ïathuh ba u la pynïeng ïa ka kali harud ka surok bad kham hadien katto-katne por eiei, u la mut ban mih noh na katei ka jaka bad ka dei ha katei ka por ba utei u post nar, u la khyllem kynsan bad tied ïa ka bynta ba shakhmat jong ka kali.
Haba ïoh jingtip halor kane ka jingjia, na ka liang ki nongtrei jong ka Meghalaya Energy Corporation Limited (MeECL), ki la leit mar-mar sha katei ka jaka ban pynlip noh ïa ka bording kaba wan lyngba ki waïar kiba ïasnoh ha utei u post ilektrik bad ban pynkynriah ïa utei u post na katei ka jaka ba la khyllem.
