Shillong, Nohprah 04
Ka Sorkar Jylla ka hap ban pynkhreh noh ban don tang kawei ka ‘Management’ ïa ki nonghikai skul hapoh ka skhim Sarva Shiska Abhiyan (SSA) kaba long katkum ka jingbthah ka Sorkar Pdeng haba pyntreikam ïa kane ka skhim kaba la tip mynta ka Samagra Shiksha.
U President ka MSSASA u Bah Aristotle Rymbai u la ïathuh ba katkum ki kyndon ka Sorkar Pdeng, dei ban don tang kawei ka management ïa baroh ki skul SSA kata ka long ban peit hi da ka Sorkar.
Hynrei ha Meghalaya la don bun tylli ki management na ka bynta ki skul SSA namar ka Sorkar ka ailad ban seng skul da ki kynhun bapher bapher.
Ha ka jingshisha, ka Sorkar Pdeng ka bei pisa ïa ki skul SSA naduh ka jingsiew tulop ïa ki nonghikai kaba la bynrap lang bad ka Sorkar jylla, hynrei ka management kam dei ka Sorkar kaba peit namar ki don da ki kynhun bapher bapher kiba seng skul bad pynïaid.
U Bah Rymbai u la ong ba ïa kane ka mat yn sa ïakren biang bad ka Sorkar khnang ban lah poi sha ka jingïabeit lang.
