Shillong, Nohprah 04
U Nongïalam ka All India Trinamool Congress (AI TC) uba dei mynshwa u Nongïalam ka Congress, Dr. Mukul M Sangma u la ong ba ki paidbah kim dei ban mutdur shuh ba u Dr. Mukul un leit phai biang sha ka Congress.
“Ai ngan pynkut noh mynta ïa kane ka jingmutdur. Ai ïa nga kawei ka daw balei ngan hap lei phai biang sha ka Congress. Ka jingïaleh ka long ïa ka bor saiñpyrthei ha kane ka Jylla bad nga la ïaleh pyrshah ïa ka kynhun kaba pynïaid mynta ban ïada ïa ka Jylla”, la ong u Myntri Rangbah barim haba kren bad ki lad pathai khubor ha ka Sngi Balang.
U la ong shuh-shuh ba u ïakhun pyrshah ïa kane ka Sorkar kaba mynta, namar ka la pynkulmar lut ïa ka jingïaid ka roi ka kiew. Kane ka Sorkar kaba mynta, ka la klun lut ïa ki kam ki jam ki paidbah bad ai pat tang sha ki katto-katne.
“Lada kylli na ki nongkhaïi bad ki nongseng kam lajong baroh kin sa pynpaw ïa ka jingbynñiaw ïa ka rukom treikam jong kane ka Sorkar, ha kaba ka ñion ïa kiba rit bad pynkulmar ïa ka kamai-kajih jong ki”, u la ong.
U la ong ba lada u leit phai biang sha ka Congress mano ban ïakhun na ka bynta kine kiei-kiei.
“Hato kam dei ka jingshisha ba ka Congress ka don lang bad ka NPP. Khie leit sha district council, phi kren ïa ka Congress ha Meghalaya ka bym tip shano ban leit, lada ki don ka jingtip shano ban leit ki la dei ban tip la ki don lang bad ka NPP ne em”, la ong u Dr. Mukul uba dei ruh u Nongïalam ka Liang Pyrshah ha ka Jylla.
U la ong ba ha rynsan paidbah ka Congress ka kren da kumwei, katba sha lyndet pat ka don hajuh bad ka NPP.
U la ong ba u Dr. Mukul u kwah ban pynkut noh ïa kane ka jingmutdur jong ki paidbah ban leit phai sha ka Congress hynrei un ïakhun ban shakri ïa ki paidbah bad ïa ka jylla.
“Nga la sdang ïa ka kam saiñpyrthei kum u MLA shimet, ngam don uta u nongïalam ïa nga sha kane ka kam, nga don tang ki paidbah kiba don kajuh ka rukom pyrkhat”, la ong u Dr Mukul.
Haba kylli shuh shuh ba un thaw da kawei ka seng saiñpyrthei ba thymmai, u Dr. Mukul u la ong ba ïa kata ka jingmutdur um shym la kyntait.
