Shillong, Nohprah 04
San tylli na phra tylli ki mat jingdawa jong ki nonghikai skul SSA la pdiang ban pyntreikam da ka tnat pule puthi ka Jylla bad ïa kine ki mat yn sa ïakren biang ha ka jingïakynduh ka ban sa long shwa ka Khristmas.
Ïa kine ki mat jingdawa la ïakren ha ka jingïakynduh hapdeng ki ophisar ka tnat pule puthi bad ki nongkitkam ka Meghalaya SSA School Association (MSSASA) kaba la lum bad pynïaid da u Commissioner and ka tnat Pule-Puthi, u Vijay Mantri ha Secre-tariat ha ka sngi Balang.
U Director ka Direc-torate of School Educa-tion and Literacy (DDEL) bad kiwei kiwei ki ophisar ki la donlang ha kane ka jingïakynduh.
Haba kren sha ki lad pathai khubor, u President ka MSSASA u Bah Aristotle Rymbai u la ong ba na ki phra tylli ki mat jingdawa, ka tnat pule-puthi ka la pdiang san tylli ban pyntreikam bad ïa kine ki mat yn sa ïakren biang ha ka jingïalang ka ban sa long shwa ka Khristmas.
U la ong ba kine ki mat jingdawa ki long ka jingshngaiñ ha kaba ïadei bad ka kam jong ki nonghikai skul SSA ha kane ka Jylla.
Ki san tylli ki mat ki long ban pyntreikam ïa ka jingsiew tulop bad pynkiew ïa ka jingïoh ki nonghikai SSA kumba long lem ki nonghikai kiba pura ban ïoh ïa jingsiew ryngkat ka DA kaba ïahap bad ka jingpynkiew tulop katkum ka Meghalaya (Revision of Pay) Rules, 2018.
La pdiang ruh ban pynkylla ïa ka Meghalaya School Education Service Rules, bad ki jingmyntoi na ka bynta ki nonghikai kiba la jan shongthait na ka kam hikai.
Shuh shuh la pdiang ruh ban pyllait noh ïa ki nonghikai SSA na ka MTET, CTET tang kito kiba la shah thung kam hadien ka jingpynbna ka NCTE ha ka 23.08.2010 kumjuh ban pyllait noh ïa ki nonghikai SSA ban thoh ïa ka eksamin MTET tang kito kiba shah thung kam hadien ka jingpynbna ka NCTE ha ka 23.08.2010.
