Mawkyrwat, Nohprah 04
Kawei ka jingjia ba ishyrkhei haduh katta katta kaba la saphriang ha ki rynsan ‘social media’ ban ïohi iwei i heprit kynthei ba dang 5 snem ka rta, i la ngat ha ka apot kaba isangsot namar shiliang ka ngab ka la pyut bad dap da ki ksaiñ.
Ine heprit i dei na ka shnong Mawbidong ha South West Khasi Hills District bad i dei i khun jong ka Kong Royal pantila Khyllem Kharai bad u Bah Overjoy Jyrwa.
Katkum ka jingïoh jingtip la ïathuh ba ine i heprit i la ïoh ïa kane ka jingshitom mynta la kumba 3 bnai eiei bad kmie-kpa ki la ïathuh ba nyngkong ki la sumar ruh da ki dawai kynbat hynrei kam ïarap bad ha kaba ki la shu thied dawai noh na pharmacy bad dei tad ynda ka jingpang ka la jur, kata ha ka 2 tarik u Nohprah 2024, ki la kit noh ïa ine i heprit sha Civil Hospital Mawkyrwat.
Lyngba ka dur khih la ïohi ba ki doktor ka Mawkyrwat ki la sei ïa ki ksaiñ bad pynkhuid ïa ka ngab jong ine i heprit bad ïohsngew ruh ïa ka jingud jingïam kaba sngewsynei haduh katta-katta.
Ïa ine i heprit ha ka 4 tarik u Nohprah 2024 la pynkit noh sha Lawmali Hospital bad haduh mynta i dang don ha katei ka jaka sumar ryngkat ka kmie u kpa bad kiba haïing hasem kiba ap.
