Shillong, Nohprah 04
Ar ngut ki MDC jong ka Congress ha KHADC kiba kynthup ïa u MDC ka Mawkhar-Pynthorumkhrah, Bah PN Syiem bad u MLA\MDC ka Mylliem Bah R.V Lyngdoh ki la shah pynbor ha ki Nongïalam Congress ba ki dei ban weng noh mardor ïa ka jingïatreilang bad ka Executive Committee ba ïalam da ka NPP ha KHADC.
Ka khubor na ki Nongïalam ka Congress ki bym kwah ban pynpaw kyrteng ki ïathuh ba kane kam dei shuh ka sien kaba nyngkong ba ka seng kan bthah ïa la ki MDC ba kin weng noh ka jingïatreilang bad ka NPP.
“Man la ki jingïalang jong ka seng, ngi la ju ïakren halor kane ka bynta tangba kam pat don kano-kano ka sienjam na ka liang jong ki MDC,” ong ki Nongïalam ka Congress.
Ki la ïathuh ruh ba kane ka jingkyntu jong ki ban weng noh ïa ka jingïatreilang ka long khnang ba kin lah ban pynkhreh pat ïalade na ka bynta ka ilekshon MDC ka ban sa long ha u snem ban wan.
Haba ïoh pat ban ïakren bad u MDC ka Mawkhar-Pynthorumkhrah, Bah PN Syiem uba bat ruh kum u Deputy CEM ha KHADC, u la kubur ba ka dei ka jingshisha ba ka don kum kata ka jingkyntu na ki nongtrei jong ka seng ba kin weng noh ïa ka jingtrei lang ha KHADC.
“Kane kam dei satia ka kam kaba lah ban shim rai noh mynta-mynta, hynrei ka donkam ban da ïakren sani bha bad syllok lang bad u MDC ka Mylliem shwa ba kin shim ïa ka rai kaba khatduh”, la ong u Bah PN Syiem.
Shuh shuh u ong ruh ba ka jingshim por jong ki ban shim ïa ka rai ka dei namar ki la don bynta lang ha kiba bun ki ishu bad ki polisi kiba ïadei na ka bynta ka bha ka miat jong ka ri bad ka jaidbynriew.
