Shillong, Nohprah 04
Ki nongtrei kiba don hapoh ka tnat PHE Mawphlang ki la pynpaw ïa ka jingeh kaba khraw bha halor ka jingslem ban ïoh ïa ka tulop. Na ka liang kitei ki nongtrei ruh ki la ud halor ka jingbym shimkhia jong ki bor ba halor kiba long kum ki kmie ki kpa ha katei ka tnad halor kane ka bynta.
Kitei ki nongtrei hapoh ka tnad PHE Mawphlang ki la pynpaw ba kane ka jingslem ban ïoh ïa ka jingsiew jong ki ka la ktah ruh ym tang ïa ki Muster Roll hynrei wat ïa ki dukan bam kiba ju kyrshan bnai ïa ki nongtrei nalor ka tulop kaba rit sa ka jingpynslem sa ka ban ai ïa ka tulop.
“Mano shuh keiñ ban shaniah ïa ki, hateng-hateng ka tulop ka sah ar bnai hynrei kin da ai ruh shibnai. Nangno keiñ ngin buria bai kot, baiskul, bai bam, bad kiwei-kiwei ki jingdawa? Da dei ba kam wan ka pang ka-shitom, da ngi ap shitom ruh kam da pher than hynrei bapli ki don kiba hap ha kaba kum katei ka khep, naei keiñ kin ïoh?”, ong kitei ki nongtrei.
“Phi ki heh-ki haiñ kiba ïoh tulop ha ka 1 tarik bad 2 tarik phim ïohi ïa ki jingeh jong ngi bad phi da kren kumne-kumtei ruh haba ngi wan ban dawa na phi, hynrei lada phi ruh phi don ha ka jaka jong ngi, phin sngewthuh katno ka long kaba syrtok bad kaba jakhom hi khait namar ka jingleh jong phi”, la bynrap shuh-shuh ki nongtrei.
Shuh-shuh kitei ki nongtrei bylla ki la ong ruh ba ki longkmie kiba khlem lok kiba don khun 5-6 ngut ki khun, ki hap ban kit da ka ram shi ñiuhmat nalor ka tulop kaba rit bad ki jingdawa kiba bun hynrei ym tang katta sa ka jingpynslem ïa ka tulop, ka long kaba eh ïa ki ba kin pyndap-pynbiang ha ïing ha sem.
“Naei kin ïoh ban pyndap? Jubab lem maphi namar kiba heh ha kaba kut ki ju ong ba lada phim im te nai trei shuh, bad kane ka long kumba ka dei ka kam shimet jongno re jongno tang namar ba ki don ha ka bor ki lah ban kren katba ki mon”, ong kitei ki nongtrei bylla. Tangba kynmaw kane kawei ba u barit ruh shisien ka sngi un ïoh la ka kylla kaba biang bad phi ruh phin sa sngewthuh katno ka pang ka jingthar jong u shiah bad lada kumne shi kumne manla ka por, kan sa poi ka por ba kin mih paidbah bad kata ka jingmih paidbah kan kham pher na kiwei pat ki jait jingïakhih”, pynkut kitei ki nongtrei bylla.
