Shillong, Nohprah 05
Ka National People’s Party (NPP) kaba ïalam ïa ka Executive Committee hapoh Khasi Hills Autonomous District Council (KHADC), ka lah ban ym pynïakhun shuh ïa katto-katne ngut ki MDC kiba mynta ha ka ilekshon ka ban sa long shen.
Ka NPP kumba ka long mynta ka don 16 ngut ki MDC ha KHADC. Napdeng kine kumba 4 ngut ki lah ban ym ïakhun shuh, don ki bym kwah shuh dalade bad don ruh kiba ka seng ka mut ban ym phah ïakhun shuh.
Katkum ka jingtip ba la ïohlum, uwei na ki kyrtong ban ym mih kyrteng shuh ha ka thup jong ka NPP u dei u MDC na Jirang, Bah Victor Ranee bad uwei pat u dei u MDC na Sohïong-Nongspung, u Bah Sherborlang Mawlong.
Ha kaba ïadei bad u kyrtong MDC na Jirang, la ïoh jingtip ba na katei ka konstitwensi ka NPP kan sei noh da u MLA ba mynta, u Bah Sosthenes Sohtun.
Ha ka taïew ba la dep la sakhi ïa ka jingleit pynïasoh Congress jong bun ngut ki nongkyrshan ka NPP na Jirang. Kane ka jingleit lypa jong ki nongkyrshan ka lah ban dei ka jingprat lynti ïa u MDC ba mynta ba un ïakhun noh na ka seng Congress ha ka ilekshon ban wan, hadien ba la sngewthuh ba um ïoh tiket shuh ha kane ka kynti na ka NPP.
Haba phai pat sha Sohïong-Nongspung la ïathuh ba u Bah Sherborlang Mawlong u la pan tiket biang. Nalor jong u ki don sa ar ngut ki nongïalam ba hakhmat ka seng kiba la pan tiket lang kiba lah ban long ka daw bad ka jingeh ïa u MDC ba mynta ban ïoh tiket biang.
Lah ban pynkynmaw ba u Bah Sherborlang u la jop ïa ka ilekshon MDC ha u snem 2019 na ka seng HSPDP bad u la leit pynïasoh sha ka NPP shwa ka ilekshon MLA 2023.
Kawei pat ka konstitwensi kaba ka NPP kan ym sei shuh da u MDC ba mynta ka dei ha Mawshynrut kaba la mihkhmat da u Bah Gigur Myrthong.
Katkum ka tyllong khubor la ïathuh ba u Bah Gigur dalade um kwah shuh ban ïakhun ïa ka ilekshon wat la kiba bun ki nongkyrshan ki dang pynpaw ka jingshaniah ha u lada u ïakhun biang. Namar kane ka jingkyntait jong u MDC ba mynta, na ka liang jong ki nongïalam ka NPP Mawshynrut Block ki la rai ban phah da ka kyrteng jong u Working President ka NPP jong katei ka block, Bah Cardinal Sohshang.
Nalor kine ka Rambrai-Jyrngam ruh ka dei kawei ka konstitwensi kaba ka NPP ka lah ban ym sei shuh da u MDC ba mynta, Bah Bajop Pyngrope, bad ha ka jaka jong u ka seng ka lah ban sei noh da u MLA barim jong katei ka konstitwensi, u Bah Kimfa S Marbañiang.
Wat la ka khubor na ki nongïalam ka NPP ka la pynthikna ba ka jingtyrwa ka dei ïa u Bah Kimfa ban long kum u kyrtong, hynrei na ka liang u Bah Bajop bad u Bah Kimfa kim shym la treh ban pynthikna lane kren ei-ei da kaba pynpaw ba ka jingïakren hapdeng jong ki ka dang ïaid.
Katkum ka khubor ba la ïoh lum ka NPP kan sa pyllait ïa ka thup ba nyngkong jong ki kyrtong mynta u bnai bad katkum ka jingong jong u President ka NPP, Bah Prestone Tynsong, ka jingpynbna ïa ki kyrtong MDC kan long shwa ka Khristmas.
