Mawkyrwat, Nohprah 05
Halor ka jingsaphriang kawei ka dur-khih ha ki rynsan ‘social media’ jong iwei heprit kynthei ba dang 5 snem ka rta ha ka por leit shah sumar bad sei ïa ki ksaiñ na ka ngab jong i kaba la pyut, na ka liang ka Dr. Marinsha Lyngdoh kaba dei ka Medical Superintendent (MS) jong ka Civil Hospital Mawkyrwat ha ka Sngi Palei ka la pynshai halor katei ka jingjia.
Haba kren sha ki lad pathai khubor, ka Dr. Marinsha Lyngdoh ka la ong ba ïa itei i heprit la wan ban pynkit da ki kmie ki kpa ha Civil Hospital Mawkyrwat ha ka 2 tarik u Nohprah 2024 bad hadien shisngi ba ki la sumar ïa i, kata ha ka 3 tarik ki la phah noh ïa i sha Lawmali Hospital Shillong namar ba ka jingmong ha ka ngab ka la jur.
Shuh shuh ha kaba ïadei bad ka jingring ïa katei ka dur-khih, ka Dr. Marinsha Lyngdoh ka la ïathuh ba ïa katei ka dur-khih la ring hi da ki nongtrei jong ka Civil Hospital ha ka por ba ki dang sumar ïa itei i heprit bad ka la ïathuh ruh ba ka jingring ïa katei ka dur-khih ka long kum shi bynta ban buh ïa ka record.
Ha kaba ïadei pat bad ka jingsaphriang jong katei ka dur-khih, ka Dr. Marinsha Lyngdoh ka la ïathuh ba ka dei ha ka por ba ki ïa sam para doktor bad lehse ka jingpur katei ka dur-khih ka lah ban dei nangta.
Na ka liang ka Dr. Marinsha Lyngdoh ka la panmap ruh na ki kmie ki kpa bad bahaïing bahasem jong itei i heprit kaba long kum shibynta ka jingpynkheiñ ïa ka hok jong ki nongpang.
Kum ban shu pynkynmaw itei heprit i dei na ka shnong Mawbidong ha South West Khasi Hills District. I dei i khun jong ka Kong Royalpantila Khyllem Kharai bad u Bah Overjoy Jyrwa bad mynta i don hapdeng ka jingshah sumar ha Lawmali Hospital Shillong.
