Shillong, Nohprah 05
U Deputy Chief Executive Member ka KHADC uba dei u MDC na Mawkhar-Pynthorumkhrah, Bah Pynshngaiñ N Syiem u la ong ba ha ka por ba donkam ki dawa kuli bym larkam shuh ruh ki don ka jingmyntoi lada nang ban dih.
“Ha ka por ba donkam wat ki dawai kuli bym larkam shuh ki don ka jingmyntoi lada ngi nang ban dih. Ha kaba kut hi kam pher la ka dei kaba la kut por ne kaba dang biang por, hynrei kaba kongsan ka dei ban noh synñiang na ka bynta ka bit ka biang ki briew jong ngi”, u la ong.
Kane ka jingkren jong u Bah PN Syiem ka long ba hapdeng ka jingshah kynthoh da ki dawai ba la kut por, ki MDC bad ka Executive Committee ka la lah ban trei, khamtam hapdeng kane ka samoi kut por dang shen ka la lah ban pynïoh haduh 6 tylli ki aiñ bad dang ha ka 2 tarik mynta u Naiwieng ka KHADC ka la ïoh ïa ka jingjop hapoh Supreme Court ban pynphai biang ïa ka bor bishar sha ki Kashari jong ka district council.
“Ka mukotduma hapoh Supreme Court ka dei kaba dang mynta 2-3 bnai bad ka dei ha ka por ba la kut ka samoi treikam, pynban ka la long ka jingkyrkhu na ka bynta ban wanrah biang ïa ka bor bishar ha district council”, u la ong.
U la ong shuh shuh ba ha u shimet um pdiang ïa kata ka kyntien ba ong kut por, namar katkum ka aiñ ka jingpynjlan ïa ka samoi treikam kam dei ba la shu leh beaiñ, hynrei ka don da ka aiñ hapoh ka riti synshar ban lah ban pynjlan ïa ka samoi treikam haduh shi snem lada ka nongrim ka biang.
Ha kawei ka liang u Bah PN Syiem u la ong ba ha district council ban trei tang da kiba thymmai kam dei kaba suk, namar wat kiba la rim ruh kam dei kaba suk ban ktaid lada ym pule bad pynkhreh da ki bnai.
U la ong ba lada dei ïa kiba thymmai kan shim por bha, da kaba pynpaw ba donkam lang ïa ki ba thymmai ruh ban ïoh ïa ki rukom pyrkhat thymmai, bad kumjuh ïa kiba la rim kiba la tip kham bha ïa kan kam.
“Lada ïoh MDC beit tang da kiba thymmai ngi kham ma, namar kane ka dei beit bad ka bor jong ka KHADC, lada ngi bakla tang tiak ngi lah kut”, la ong shuh shuh u Deputy CEM.
