Shillong, Nohprah 05
U Symbud Myntri Rang-bah uba peit ïa ka tnat Pynroi Sor, Bah Sniawbhalang Dhar, u la ong ba u la pynpaw hakhmat ka kynhun kiba die madan ba ka sorkar kan thaw lad ban pynïoh jaka kaba biang na ka bynta jong ki ba kin lah die ïa ki mar jong ki bad ki dei ban ïatreilang bad ka Sorkar.
U Bah Dhar u la ong ba ka Sorkar kan pyrshang ban pynkynriah ïa ki sha ka jaka kaba paka kumba la kyrpad da ka kynhun kiba die madan bad u la kular ba ma u ruh u don bad ki.
“Phi lah ban nym ïoh thik kumba phi kwah, ngi ruh ngi lah ban nym ïoh thik ïa kaei kaba ngi kwah, hynrei ngi hap ban pyrkhat ban pynïoh ïa ka jaka kaba biang,” u la ong.
Haba kylli kumno ka Sorkar kan jied namar ki la nang bun bad da ki hajar ngut kiba shim kabu ban kyntur harud lynti bad harud surok ban die jingdie, u Bah Dhar u la ong ba ka don ka kyndon kumno ban jied, bad tang kiba la pynrung kyrteng (register) nyngkong la kumno-kumno kumba 600 ngut kin ïoh bad ïa mynta, la ithuh katto-katne ki jaka ban pynkynriah ïa kiba die madan bad yn sa rai lang bad ophisar lem bad ki kiba shong die madan.
Ka jingkylli ka long balei ka Sorkar ka jem palat ha kaba la nang shim kabu ki briew ban shong die jingdie katba mon wat hapdeng surok bad harud surok bad harud lynti kaba ktah pat ïa ka hok jong ki para briew kiba ïaid lynti bad buh jingma ruh ïa kito kiba shong die madan ha ka jaka bym dei satia ban shong.
