Shillong, Nohprah 05
Ka Supreme Court ha ka 2 tarik u Nohprah ka la pynsangeh ïa ka hukum jong ka Meghalaya High Court, kaba khang ïa ki kashari jong ki District Council ban shim bishar ïa ki kam runar bad kiwei ki mukotduma hapdeng ki riewlum bad ki bym dei riewlum.
Ka Division Bench jong ka High Court ka la pynksan ïa ka jingshah rai pynrem jong uwei uba shah kynnoh, u Komerchand Sing Wanrieh da ka Sessions Judge/ District D.C. Ri Bhoi District.
Haba pyntip ïa kane, u Deputy Chief Executive Member (Dy CEM) ka Khasi Hills Autonomous District Council (KHADC), Bah Pynshngaiñ N Syiem u la ïathuh ba ka Supreme Court ka la pynsangeh ïa ka hukum jong ka Division Bench.
U la ong ba ka sorkar jylla ka la pynmih ïa ka jingpynbna ha ka 22 tarik Nailur 2022, ba ïa ki kam mukotduma kiba ïadei bad ki kam runar dei ban ïaid beit sha ki District and Session Court. Halor kane ka jingpynbna na ka sorkar, ka High Court Meghalaya ka la pynmih ïa ka hukum ha ka 17 tarik Rymphang 2023, ba kan treikam noh ka Meghalaya Judicial Services Rules 2006 kaba mut ba la pynïap ïa ka bor ki kashari jong ki district council.
U la ïathuh ba halor kane ka rai, ka KHADC ka la leit ujor sha Supreme Court ka Ri, bad ka Supreme Court ka la pynsangeh ïa kane ka hukum ka High Court.
U la ong ba hadien ba la pynmih hukum da ka High Court, ki mukotduma kam runar ki khlem poi shuh ban shah bishar ha ki kashari jong ki district council naduh u snem 2023.
Hynrei u la ong ba lyngba kane ka hukum jong ka Kashari baheh duh jong ka ri India ha ka 2 tarik Nohprah 2024, ki Kashari ha ki district council kin lah ban shim bishar ïa ki mukotduma kam runar bad kiwei hapdeng ki para riewlum.
Na ka liang u Bah PN Syiem u la pynpaw ka jingsngewkmen ïa kane ka rai jong ka Supreme Court. U la ong ba kane ka dei kawei ka daw bah ba ka bishar kan dei beit sha ka district council khamtam ha kaba ïadei bad ka mukotduma hapdeng para riewlum.
