Shillong, Nohprah 05
U Working President ka Meghalaya Pradesh Congress Committee (MPCC) uba dei u Deputy CEM ha KHADC, u Bah Pynshngaiñ N Syiem u la kubur ba ka jingpynbor ka khluit bha ïa ki ar ngut ki MDC ban weng noh ïa ka jingïatreilang na ka executive committee ba la ïalam da ka NPP.
“Kaba khluit bha ka jingïakren hapoh ka seng Congress ka dei halor ka jingïatreilang hangne, kano-kano kaba khluit te ha kaba kut kan sa mih hi, da ka mih hap ban shai bad ha ki katto-katne sngi kan shai”, u la ong.
Hadien ba kiba bun na ki Nongïalam ka Congress ki la pynbor beit ïa ki MDC ba ki dei ban weng noh ka jingïatreilang bad ka NPP, ki tyllong ki khubor ki ïathuh ba kine ar ngut MDC ki lah ban weng noh ha kano-kano ka por mynta hi u bnai na ka EC ba la ïalam da ka NPP ha KHADC.
Haba kylli halor kane, na ka liang u Bah PN Syiem um shym la kren shai satia hynrei u la ong, “Haduh mynta ngam lah ban ong ei-ei. Nga ong ïa phi tang ha ki khyndiat sngi kan sa shai”.
Haba kylli shuh shuh, u la ong ba kane ka jingshah pynbor kam dei satia tang mynta ba la jan ka ilekshon, hynrei ka jingdawa ban ym ïatreilang ha ka EC ka la mih hynriew bnai mynshwa, bad bynrap ba naduh katei ka por kum u MDC u sngewdonkam ban pyndep shwa ïa ki kam ba dei na ka bynta ka KHADC.
Halor ka jingkynthoh jong u Dr Mukul Sangma ba ka Congress kam beit lynti bad ka don hajuh bad ka NPP, na ka liang u Nongïalam ka Congress u la ong ba um don ei-ei ban kynthoh namar ka dei ka jingsngew ka jong u.
“Kum kita kiei-kiei kiba pynlong ïa ki nongtrei jong ka seng Congress ruh ban pyrkhat lang kumta, ïa ka jingkren u Dr Mukul ka dei ka jingsngew jong u, namar ha kaba kut ki katto-katne ngut ki Nongïalam ka Congress lada ngi don hangno-hangno ruh ngi don ïa u synñiang u bynhei na ka bynta ka jaidbynriew”, u la ong.
Haba kylli shuh shuh, u la ong,”Kaba kloi than ruh kam long bad kaba slem than ruh kam long ka shong ha ka por, ngin sngap bha ha kine ki sngi kumno ka long”.
