Shillong, Nohprah 05
Ka tnat Ïada Ri (Defence) ka Sorkar Pdeng ka la khot ïa ka Sorkar Jylla ban ïakren halor ka jaka kaba dang lait, bad kane ka don jingïadei ruh bad ka mat Them Metor kaba dei ka jingeh kaba ka Sorkar Jylla ka la kwah ban pynbeit noh da kaba pynkynriah ïa kiba sah ha kane ka jaka shawei pat kumba la dawa da ki paidbah.
Haba ïakren bad u Symbud Myntri Rangbah uba peit ïa ka tnat Pynroi Sor, Bah Sniawbhalang Dhar, u la ong ba ka Sorkar Jylla ka la ïohpdiang ïa ka jingkhot na ka tnat ïada ri ban ïakren ha kaba ïadei bad ka jaka jong ka tnat ïada ri (defence) ha kaba u Myntri Rangbah u Conrad K Sangma un ïakren ïa kane ka kam ha Delhi.
Haba kylli kaei ka jingïadei jong ka jingïakren bad ka tnat ïada ri bad ka mat Them Metor, u Bah Dhar u la ong ba ym pat lah ban tip bha ha kano ka rukom kan long, hynrei lada ka tnat Defence ka lah ban ai ïa ka jaka kaba dang lait sha ka Jylla kan long ka jingïarap.
U la ong ba ka Jylla kan sa peit kaei kaba mih na ka jingïakren bad ka tnat ïada ri jong ka Sorkar Pdeng.
U Bah Dhar u la ong ruh ba ka jingpynkynriah ïa kiba sah ha Them Metor kan long katkum ka jingpynkhreh kaba la pynwandur (blue print) bad lada don ka lad kaba kham biang kumno ban pynbeit ïa kane ka jingeh yn sa khmih bniah da kano ka lad kaba biang tam eh.
U la ong ba ka jingkhot ka wan na ka tnat Defence ban ïakren bad yn sa tip ynda la dep ban ïakynduh.
Ka jingpynkynriah ïa kiba sah ha Them Metor ka dang sahteng haduh mynta bad ka Sorkar Jylla ka ïakynduh jingeh namar ka hap ban ïasaid ïa ka mukotduma ha Ïingbishar nalor ka jingpan por jong ka Harijan Panchayat Committee ban ïakren pynbeit ha kaba ïadei bad ka jingpynkynriah ïa kiba sah ha Them Metor.
