Shillong, Nohprah 05
I heprit kynthei, 5 snem ka rta bad i ba la ngat ha ka apot kaba isangsot haduh katta-katta ha kaba shiliang ka ngab jong i ka la pyut bad dap da ki ksaiñ, mynta i la kham khlaiñ bad ïoh bor hadien ka jingshah sumar ha Ganesh Das Government Maternal And Child Health Hospital Lawmali, Shillong.
I tei heprit i dei i khun jong ka Kong Royal Pantila Khyllem Kharai bad u Bah Overjoy Jyrwa. Haba ïoh ban ïakren lyngba ka phone bad ka kmie jong itei i heprit i dang don mynta hapdeng ka jingshah sumar ha katei ka jaka ai jingsumar. Ka la ïathuh ba ka khun jong i mynta ka la kham khlaiñ bad ka la lah ban ïalehkai hynrei ka dang hap ban shah sumar hapoh katei ka jaka ai jingsumar.
Ka kmie jong itei i heprit ka la ïathuh ruh ba ka la don shi bnai ba la phah sumar ïa itei i heprit da u dawai kynbat bad ong ba ka jingpyut ka ngab jong itei i heprit ka lah ban dei na ka jingsumar da u dawai kynbat.
Kum ban shu pynkynmaw hangne, itei i heprit i la ïoh ïa kane ka jingshitom mynta la kumba lai bnai eiei hynrei ki kmie-ki kpa ki la shu thied dawai na ka dukan die dawai bad ka dei tad haduh ba kane ka jingpang ka la jur kata ha ka 2 tarik u Nohprah 2024 ba kin sa pynkit noh ïa ine i heprit sha Civil Hospital Mawkyrwat bad ha ka 4 tarik u Nohprah 2024 pat la pynkit noh sha ka jaka sumar ha Lawmali namar ka jingjur eh ka jingmong.
