Nongstoiñ, Nohprah 05
U Superintendent of Police (SP) ka West Khasi Hills District u la pyntip paidbah na ka daw jong ka Eucharistic Procession jong ka Nongstoiñ Diocese ha Umwahlang Parish ka ban long ha ka 8 tarik u Nohprah, 2024, la pynbeit ban bud ryntih ïa ka jingpynïaid ïa ki kali bad ki nongleit nongwan sha katei ka proseshon.
Katkum ka kyrwoh na u SP, la ong ba yn ym shah ïa ki kali ban rung na ka ïingmane Catholic barim bad St Francis School Umwahlang, ki kali kiba don ïa ki car pass kiba wan sha katei ka proseshon kin ïaid na ka surok Nonglang sha St. Francis Umwahlang lyngba ka sub way.
Nangta, yn ym shah ban pynïeng ïa ki kali ha ki rud surok Riwiang haduh Kyrdum bad ki kali kiba ïaid na Langpih sha Nongstoiñ kin shim da ka surok Langpih-Tieh Thawiar-Langja Nonglang.
Shuh shuh ka kyrwoh khubor ka ong ruh ba kitei baroh ki jingpynbeit yn pyntreikam naduh ka 6 baje mynstep jong katei ka sngi haduh ban da kut ka proseshon.
U SP u la kyntu ruh ïa ki nongleit nongwan ban kiar ban ïaid na Nonglang sha Riwiang ha katei ka sngi lait noh tang ïa kiba donkam kyrkieh.
Ha kawei pat ka khubor, u Deputy Commissioner ka West Khasi Hills u la pyntip paidbah ba kino kino ki jingregister kyrteng ïa kino kino ki seng ne kynhun seng la ki dei ki local ne Government Association/Body kiba pyndonkam ïa ka kyrteng “Press Council” la khang pyrshah hapoh ka District.
