Shillong, Nohprah 05
Ka State Election Committee jong ka Khun Hynñiewtrep National Awakening Movement (KHNAM) ha ka 5 tarik u Nohprah, 2024, ka la pynbna paidbah ïa ka thup kyrteng banyngkong jong ki kyrtong ban ïakhun ïa ka ilekshon sha ka Khasi Hills Autonomous District Council (KHADC) ka ban sa long ha u snem 2025.
Katkum ka kyrwoh khubor ba la pyllait sha ki lad pathai khubor, ka Central Executive Committee ka seng lyngba u General Secretary, Bah James MA Neng, ka la pyntip paidbah ba hadien ka jingshong pyrkhat kam ha ka 5 tarik u Nohprah, 2024 ban ïamir jingmut halor ka thup kyrteng ba la pdiang bad phah da ka State Election Committee ha kaba ha kane ka committee ka seng ka la pynskhem ïa ki kyrteng jong ki kyrtong ha ka thup banyngkong ki ban ïakhun ïa ka ilekshon na ki 8 tylli konstitwensi.
Ki kyrteng jong ki kyrtong ha ka thup banyngkong ki ban ïakhun ïa ka ilekshon na ka seng ki long napoh ka 19-Jaïaw yn ïakhun da u Bah Thomas Passah bad uba dei ruh Working President ka seng, na 6-Sohryngkham da u Bah Joseph H Pyngrope, na 7-Mawkynrew da u Bah Pynshai Mawrie, na 9-Langkyrdem-Laitkroh da u Bah Banplieborlang Mawroh, na 17- Laitumkhrah-Malki da u Bah Peter Challam, na 18-Mawkhar-Pynthorumkhrah da u Bah Raymond Basaiawmoit, na 11-Shella da u Bah Lasuklang War bad na 25-Mawkyrwat da u Bah Baristar Poul Thyrniang.
Ka seng ka la pyntip ruh ba ka committee ka dang buh-teng ban rai halor ki kyrtong ki ban ïakhun na kiwei pat ki konstitwensi ka ban sa pynmih ha ka thup kyrteng ba ar.
