Shillong, Nohprah 05
U Bah John Robert Khongjee ba shong ba sah ha Mawlai Mawïong u la mih shakhmat lyngba ki lad pathai khubor ban ïathuh ba u la shah ‘hack’ ne shah tuh ka ‘WhatsApp’ jong u ha uwei u briew u bym shym la ithuh satia bad uba la kam ïalade kum u Pastor na ka Ri England.
Haba ïakren bad U Nongsaiñ Hima, u Bah John Robert Khongjee u la ïathuh ba ha ka step jong ka 3 tarik u Nohprah, 2024, katba u dang don ha ka lynti ban leit sha ka jaka trei, u la ïohpdiang kynsan ïa kawei ka ‘phone call’ na uwei u briew uba la kam ïalade ba u dei u Pastor bad uba la ai kyrteng kum u Emmanuel uba dei na ka Ri England, uba la pyntip ïa u Bah Khongjee ba ha ka por 8 baje janmiet, kan sa don ka ‘Joint Meeting’ ne ka jingïakynduh lang jong ka ‘Bible Society’. Na ka liang u Bah Khongjee mar sien ïohsngew ïa kane ka jingpyntip, u la sngewshngaiñ bad khlem da don satia ïa kano-kano ka jingmut kaba sniew ïa uta u briew uba la kam ïalade kum u Pastor.
Hadien kata ka jingïakren, uta u briew uba la kam ïalade ba u dei u Pastor u la phah ïa u Bah Khongjee ba un ïashimbynta ha katei ka jingïalang lyngba ka ‘WhatsApp’ da kaba pan ruh ïa u nombar ne u ‘code number’ u ban wan poi ha ka mobile nombar jong u Bah Khongjee khnang ba un ïoh ïa ka ‘link’ ha ka por janmiet ha shwa ban sdang kata ka jingïalang.
Ha katei ka por, na ka liang u Bah Khongjee u la batai ïa kita ki 6 tylli ki nombar sha uta u briew, bad mar kumta hi, ka ‘WhatsApp’ jong u, ka la jah kynsan bad haba u la pyrshang ban plie ïa ka ‘WhatsApp’ jong u ruh hynrei kam long shuh.
U Bah Khongjee u la ïathuh ba haduh mynta ruh hadien ba ka ‘WhatsApp’ jong u ka la shah tuh ne shah ‘hack’, kata ka ‘WhatsApp’ jong u, ka dang treikam sah. Haba don ba phah ‘message’ ruh ka dang paw bad ka dang treikam bha bad ki dur-ki dar jong u Bah Khongjee ruh ki dang paw ha ka ‘WhatsApp Profile’.
Hynrei kaei kaba la pynlyngngoh ïa une u rangbah ka long ba wat hadien ba u la thmu ban pyrshang phone biang ïa utei u nombar ruh, utei u briew uba la kam ïalade u Pastor um shym la don shuh ka kyrteng ba la thoh ‘Pastor’ bad u nombar ba u la phone sha u Bah Khongjee ruh u la jah bad ym don shuh hapoh ka mobile jong u Bah Khongjee.
Shuh-shuh u Bah Khongjee u la ïathuh ba u la phone sha i lok jong u bad ong ïa i ba in phah ‘message’ ha utei u mobile nombar jong u bad mar kumta na ka liang i lok jong u ruh i la leh kumta, bad kham hadien pat i la ïohpdiang ïa ka jubab na utei u nombar bad haba pyrshang ban phone pat, ym shym la don satia mano-mano ruh ba shim.
Halor kane ka jingjia, u Bah John Robert Khongjee ha ka 4 tarik u Nohprah 2024, u la leit ban ujor noh da ka ejahar hapoh ka thanat Mawlai bad hadien kata pat, u la leit ban ujor sa hapoh ka ‘Cyber Crime’ khnang ba kin leh ïa kaba donkam.
Shuh-shuh u Bah Khongjee u la kyntu ïa ki paralok-parajor ba ki dei ban long kiba husiar bha ha ki kam jong ki khnang ba kin lait na kino-kino ki jingshah thok-shah shukor ha kum kine ki briew.
“Ka jingthmu jong nga hangne ka long ba ki paralok kin ïatip lang ïa kine kiei-kiei bad ba kin long kiba husiar”, ong u Bah Khongjee.
U la ïathuh ruh ba katkum ka sur kren jong utei u briew la sngewthuh kumba u dei uba na ka Ri India ym kum ka sur Phareng ne ka sur jong ki Khasi.
