Nongpoh, Nohprah 05
Ki pulit jong ka jylla Arunachal Pradesh lyngba ka thanat Itanagar ha ka miet Sngi Balang ki la ïoh ban kem noh ïa u Bah Badhok Nongmalieh uba dei u Rangbah Shnong jong ka Mawtnum hadien ka jingaibor jong ka ïingbishar Judicial Magistrate First Class (JMFC) katkum ka Non-Bailable Warrant of Arrest (NBWA).
Halor katei ka jingkem jong ki pulit ka jylla Arunachal Pradesh ïa u Bah Badhok Nongmalieh, uba dei ruh uwei na ki kyrtong ba la ïakhun teng ha ka ilekshon MLA ha ki snem ba la dep na Nongpoh bad Jirang konstitwensi, ym pat ïoh satia ïa ka jingtip kaba thikna na kaei ka daw namar ka jingtohkit ka dang ïaid shakhmat ha katei ka jylla.
Shuh shuh, katkum ka tyllong khubor ba la ïoh lum, la ïathuh ba ïa u Bah Badhok Nongmalieh, ki bor pulit ka jylla Arunachal Pradesh, ki la ïoh ban kem noh ha ka miet jong ka Sngi Balang hadien ka jingthwet kaba jur bad ryngkat ka jingïarap lang jong ki pulit ka Ri Bhoi District.
