Shillong, Nohprah 05
Ka tnat Pulit jong ka jylla lyngba ka Central Recruitment Board ha u kyrwoh khubor ba la pynmih paidbah ha ka 5 tarik u Nohprah 2024, ka la pyntip paidbah ha kaba ïadei bad ka jingsdang biang ban pynlong ïa ka jingmareh na ka bynta ka kam pulit hapoh ka jylla kaba la pynsangeh naduh ka 22 tarik u Naiwieng 2024 na ka daw ka jingthut ha ki kor ki bor kiba la pyndonkam ban shim jingthew ïa ka wat kaba ki khynnah samla ki mareh ha 1st MLP Bn. Mawïong bad 4th MLP Bn, Sohpian.
Halor kane na ka liang u Chairman jong ka CRB u Dalton P Marak u la pyntip ba ka tnat pulit sa shisien kan pynlong thymmai biang ïa ka Physical Efficiency Test (PET) kaba kynthup naduh ki samla kiba la sdang ïa ka jingmareh naduh 18 tarik haduh 21 tarik u Naiwieng 2024 ha ka madan jong ka 1st MLP Bn., Mawïong bad ka 4th MLP Bn., Sohpian.
Ïa ki tarik thymmai ban pynlong biang ïa ka PET na ka bynta ka kam pulit kan dei naduh ka 13 tarik haduh ka 20 tarik u Nohprah 2024 ka ban pynmareh ïa ki khynnah kiba dei ka jaka kaba don ha 3rd MLP Bn., Sahbseiñ, Jowai nangta ha ka 6 tarik haduh ka 11 tarik Kyllalyngkot yn pynlong ïa ka jingmareh 5th MLP Bn., Samanda, Williamnagar bad ha madan jong ka 4th MLP Bn., Sohpian, Nongstoiñ bad ka tarik khatduh ban pynlong ïa ka jingmareh kan long naduh ka 13 tarik haduh 15 tarik u Rymphang 2025 ha madan jong ka 1st MLP Bn., Mawïong, Shillong bad ha ka 2nd MLP Bn., Goeragre, Tura.
Shuh shuh na ka liang ka tnat pulit ka la pyntip ruh ba ki khynnah kiba dei ban pyndep ïa ka PET hapoh ka 3rd MLP Bn., Sahbseiñ, Jowai, ki lah ban ïoh ïa ki Admit Card napoh ka website jong ka Meghalaya Police naduh ka 6 tarik Nohprah 2024, katba ki khynnah kiba hap ban mareh ha kiwei pat ki jaka ki lah ban ïoh ïa ki Admit Card naduh ka 16 tarik u Nohprah 2024.
Ha kajuh ka por la kyntu ruh ïa ki samla ba kin pyntikna ïa ki jingtip ba bniah ha shwa ban ïoh ïa ki Admit Card bad kan don ruh ka lad ban pynbeit ïa ki jingtip ha shwa ban ïoh ïa ki Admit Card bad ki samla kiba kwah ban pynkylla ïa ka tarik jong ka PET ki lah ban phah da ka shithi sha u Member Secretary jong ka Central Recruitment Board ha shwa ka jingpynlong ïa ka PET bad la kyntu ruh ïa ki samla ba kin peit ïa ka website jong ka tnat pulit na ka bynta ki jingtip kiba bniah.
