Shillong, Nohprah 06
Ka Federation of Khasi Jaiñtia and Garo People (FKJGP) ha ka 3 tarik mynta u bnai ka la leit ban ïakynduh ïa u Deputy Director ka North Eastern Indira Gandhi Regional Institute of Health and Medical Sciences (NEIGRIHMS), u Lt. Cdr. Pawan Deep hadien ka jingïoh jingujor ba la kynnoh ba u Director, Dr. Nalin Mehta u la mana ïa ki nongtrei kiba dei ki Khristan ban pynitynnad ïa ka ‘Hospital’ ha ka por Khristmas.
Ïa ka kynhun jong ka FKJGP la lamkhmat da u Senior Vice-President ka seng, Bah Elton Cliff Warjri.
“Ha kane ka jingïakynduh jong ka seng bad u Deputy Director, u la ong ba ym don jingthmu satia ban khang pynitynnad ïa ka ‘Hospital’ ha ka por Khristmas,” ong u Bah Warjri ha ka kyrwoh khubor.
Haba kdew ba ka seng ka la ïoh ïa ka jingtip ba tikna ba ka don ka jingpyrshang ban ym shah pynitynnad ïa ka ‘Hospital’ ha ka por Khristmas, utei u nongïalam u la ong ba ka seng ka ïoh jingtip ba ha ka 5 tarik Nohprah, na ka liang u Director u la don ka jingïalang bad ki nongtrei ka NEIGRIHMS bad hadien kane, u la shah ban pynitynnad ïa ka ‘Hospital’.
Ha kawei ka liang, u Bah Warjri u la ong ba ka seng ka pynpaw ka jingsngewlyngngoh ba naduh ba sdang ka NEIGRIHMS ban shakri ïa ki paidbah ka Jylla bad ka Thaiñ Shatei Lam Mihngi, kam shym la don ka jingpynthut ban lehkmen Khristmas hynrei mynta u snem, kynsan-kynsan ka mih kane ka hukum.
“Ka jingpyniphuh jingpyniphieng ïa ka ‘Hospital’ na bynta ka Khristmas kan ym pynthut satia ïa ki nongpang namarba kan ym don kano-kano ka jingsawa,” ong u Bah Warjri.
Shuh shuh ka seng ka kyrmen ba ha ki snem ki ban wan, kiba kum kine ki jingpynwit kin ym don shuh – kaba lah ban wanrah ka jingsngewsih ïa ki paid Khristan jong ka Jylla.
