Nongpoh, Nohprah 06
Kawei na ki surok kaba la bna nam ha ka Jylla lyngba ka jingmih ban ïakhih jong kawei ka longkmie na ka thaiñ Umden, ka Kong Bindas Syiem ban shong shah thngan ha phyllaw jong ka Additional Secretariat ha nongbah Shillong ban dawa pyntrei noh ïa ka surok Nongpoh-Umden-Sonapur, kaba don ïa ka jingjngai kaba 58.6 kilomitar shen kan sa urlong noh lyngba ka jingïai buddien bad jingshimkhia jong u MLA ka Nongpoh, Bah Mayral-born Syiem.
Kum ban shu kdew hangne, hadien ka jingïakhih jong ka Kong Bindas Syiem bad ka jingïai buddien jong u MLA ka Nongpoh konstitwensi, ka Sorkar Jylla ha ka 10 tarik u Risaw, 2024 ka la dep ban mang tyngka shuwa ïa ka surok kaba pynïasoh na Umden sha Sonapur lyngba ka skhim PMGSY-III, Batch-I ha ka jingjngai kaba 38.6 kilo mitar bad ha ka jinglut kaba la kot sha ka T. 47 klur tam.
Ha kawei ka liang, ïa ka surok kaba pynïasoh na Nongpoh sha Umden, la mang tyngka lyngba ka State Plan ha ka 26 tarik Naiwieng, 2024 ha ka jinglut T. 49.53 klur bad ka jingjngai 20 kilomitar.
Kane ka jingmang tyngka jong ka Sorkar ban shna pynbha noh ïa katei ka surok ka la wanrah ïa ka jingkmen bad phuhmut-phuhmat ïa ki paidbah nongshong jong ki spah tylli ki shnong katei ka thaiñ kiba ju pyndonkam ïa katei ka surok, kiba la im jynjar bad im sohsat ha kine ki phew snem kiba lah dep, namar ka jingsniew ba palat liam jong ka surok khamtam ha ki por slap.
Katkum ka dawot kaba la soi da u Executive Engineer ka tnad Public Works Department (Roads), Nongpoh Division, u Bah M. Pyrbot, ïa kane ka surok kaba pynïasoh na Nongpoh sha Umden, yn sa wan ban buh mawnongrim noh ha ka 10 tarik u bnai Nohprah, 2024 da u Bah Prestone Tynsong, Symbud Myntri Rangbah ka Jylla ba dei khmih ruh ïa ka tnad PWD (Roads) kum u kongsan ha ka jingdon ryngkat jong u Bah Mayralborn Syiem, MLA ka Nongpoh, kum u Symbud Kongsan.
Shuh shuh, la ïoh jingtip ba katkum ka tyllong khubor, ïa kane ka surok la khmih lynti ba yn lah ban sdang pyntrei noh shaid-shaid naduh u Kyllalyngkot 2025. Nangta kan long da shisha ka jingkyrkhu kaba khraw ïa ki paidbah kane ka thaiñ kiba la ju ud-nam na ka por sha ka por halor ka jingeh kaba ki kynduh na ka jingsniew palat jong ka surok ha kine ki phew snem ba lah dep.
