Shillong, Risaw 14
U Shongknor ka Khasi Hills Autonomous District Council Bah Strongpillar Kharjana um shym la shah ïa u Bah Equator Nongrang uba dei u MDC na Mairang ban wanrah da ka ‘zero hour notice” halor ka jingmih ha ki lad pathai khubor ba ïa ka jingpynbeit thymmai ïa ka “Land bill” la shah pynphai da u Lat ka Jylla.
Hadien ba la kut ka kynta kylli jingkylli u Bah Equator u la ïeng ban kren halor ka jingmih ha ki lad pathai khubor ba u Lat ka Jylla u khlem treh ban soi hynrei u phah pynphai ïa ka Khasi Hills Autonomous District Council (Regula -tion and Administration of Land) (Amendment) Bill, 2026.
Na ka liang u Shongknor u la ong ba ka jingbym shah ban ïakren ïa kane ka phang ka dei namar haduh mynta um pat ïoh ïa ka jingthoh na u Lat ka Jylla ba u la pynphai hynrei um shah ban ïakren haba mih tang ha ki lad pathai khubor.
Na ka liang u Bah Ricky Shullai u MDC na Laban-Mawprem Constituency u la ïeng ban bynrap ba kane ka dei ka jingshisha haba la kren hi da u Symbud Myntri Rangbah ka Jylla uba peit ïa ka tnad DCA u Bah Prestone Tynsong.
Haba phai ha ki kynta kylli jingkylli, ka Kong Deity H. Majaw kaba dei ka Executive Member jong ka KHADC ba dei peit ïa ka tnad aiñ ka la ïathuh ba ka jingbym lah ban thaw ïa ka ‘Tribunal’ ka dei namar ba ka don ka jinglut namar hap thung sa ar ngut ki dkhot kiba don jingtip shaphang ka riti dustur haba ïadei bad ka jingkheiñ kur u Khasi bad hap thung sa u ‘advocate’ uba la don jingtbit kumba shiphew snem.
Ka Kong Deity ka la pyntip ha ka dorbar jong ka KHADC kaba la long mynta ka sngi haba jubab ïa ka jingkylli bynrap jong ka Kong Grace Mary Kharpuri kaba dei ka MDC na Nongshken Constituency.
Ka la ïathuh ba ki Seng Kur kiba la pynrung kyrteng ha KHADC haduh mynta ki la don haduh 113 tylli.
Ka Kong Grace Mary Kharpuri ka la ong ïa ka Kong Deity Majaw ba ym dei ban ai daw bym don pisa haba thaw ïa ka ‘tribunal’ ha ka Khasi Social Custom of Lineage Act namar ym donkam ban pynlut pisa namar ka council ka la don lypa u Magistrate First Class bad Standing Counsel na bynta ban pynïaid ïa ki kam jong ka council.
