Shillong, Risaw 14
Ban weng ïa ka jingeh na ka jingpynïeng kali kulmar hapdeng jong ka sor, ka Sorkar Meghalaya kala rai ban pynkynriah ïa baroh ki kali tourist na Assam sha ki ar tylli ki jaka bala ithuh kyrpang, kata ha MUDA Parking ha Keating Road bad ka SRGT.
U Symbud Myntri Rangbah ba khmih ïa ka tnad Transport Bah Sniawbhalang Dhar u la ong, ïa kane ka rai la shim ha ka jingïalang ba la long ha ka sngi Balang bad ki ophisar ka tnad Transport.
“Kane ka la dei ka mat ba sahteng naduh kine ki khyndiat taïew ba la lah. Ngi la ïakren hangno ban pynïeng ïa ki kali tourist na Assam hangne ha sor. Mynta ngi la rai ban ai jaka ïa ki ha ka thaiñ Keating Road kaba don ka jaka pynïeng kali ka MUDA,” ong u Bah Sniawbhalang.
U la ong, ki jingujor kila nang kynton halor ka jingpynïeng kali pathar hajan jong ka Secretariat, Nan Polok bad Pinewood Hotel.
“Ngi la ïoh pdiang ïa ka jingkyrpad na u Myntri ka Sorkar Assam Atul Bora, uba dei u Chairman ka Committee na Assam, bad ïoh ruh ïa ka jingthoh na ki nongpynïaid ki kali tourist ka Assam. Mynta ka sngi ngi la shim rai ïa ka jingpynbeit,” u la ong.
Katkum ka plan, ki kali rit kin pynïeng hapoh ka MUDA Complex katba 10-20 tylli ki bos heh yn shah ban ïeng ha SRGT.
“Kam itynnad satia haba ki shu pynïeng ha shilynter ka surok. Kane kan pynbeit ryntih bad pynitynnad. Ki lah ban pynhiar ïa ki nongshong kali ha Secretariat ne Khyndailad bad sa leit pynïeng ha kine ki jaka ba la buh. Ki kali trai jylla kila dep don lypa ïa la ka jong ka jaka pynïeng kali,” ong u Bah Sniawbhalang.
Halor ka jingpan jaka pynïeng kali jong ka Khasi Hills Tourist Taxi ha Guwahati Airport, u Bah Sniawbhalang u la ïathuh ba ka Sorkar Jylla kala ïakren ïa kane ka kam bad ka Adani Group kaba pynïaid ïa ka airport.
“Ka kam, kam pat dep pura satia. Shisien bala dep shna ïa ka jaka pynïeng kali, kin sa buh kyrpang ïa ka jaka na ka bynta jong ngi,” u la ong.
U Symbud Myntri Rangbah u la ong ba ka jaka pynïeng kali ha ISBT ka plie lut ïa baroh bad ong ba kam don satia kano-kano ka jingpyrkhing ïa ki kali tourist ba kin leit sha ki jaka jngohkai.
“Ki lah ban leit kat shaba ki kwah, Sohra, Dawki. Mano ba lah ban khang ïa ki,” u la ong.
