Nongstoiñ, Risaw 14
Kawei ka kali kit nongpang kaba dei jong ka Aradonga Primary Health Centre (PHC) ha ka por mynsngi jong ka sngi Balang, ka la kem ding kynsan bad julor bun.
U Superintendent of Police (SP) ka West Khasi Hills u la ong ba katkum ka khubor na Athiabari Outpost la ong ba kane ka jingjia kala jia ha ka por kumba 3:15 janmiet ha ka por ba kane ka kali kit nongpang kaba don ïa u registration number NL07-T-1019 ka dang thmu ban leit sha Riangdo ban leit sha ka Medical Camp.
Shuh shuh u la ong ruh ba ha ka jingtohkit, la ïoh jingtip ba katei ka kali ka la kem ding kynsan mar ïa poi ha Sigunbari, kaba la pynlong ïa u nongñiah ban mih noh mar mar na ka kali kit nongpang ban pynlait im ïalade.
U SP u la ong ruh ba mar ïa ïoh jingtip halor kane ka jingjia, ki ophisar bad ki nongtrei jong ka Riangdo Fire and Emergency Services ki la hiar mar mar sha katei ka jaka ban peit ïa ka jinglong jingman.
Ka khubor na u SP ka ong ruh ba katkum ka jingong u nongñiah, ka jingpluh ding ka lah ban dei na ka jingthut jong ki waiar jong ka kali, hynrei donbok ba ym shym la don ba mynsaw ha katei ka jingjia, lait noh ka jingjulor jong ka kali namar ka jingkem ding kynsan.
