Shillong, Risaw 14
Ka Khasi Jaiñtia Deficit School Teachers’ Associa -tion (KJDSTA) bad ka Garo Hills Deficit School Teachers’ and Employees’ Association (GHDSTEA) kiba la shim ïa ka Mass Casual Leave mynta la ar sngi ki la ïathuh ba ka jingïakhih ban dawa ïa kaba ki dei hok ban ïoh kan ym kut tang ba la kut kane ka jingïakhih ba lai sngi.
Haba kren sha ki nongthoh khubor ha ka sngi Balang u President ka KJDSTA u Babu Boswell Pala u la ong, “Ïa kaba dei hok ban ïoh, ïa kaba ktah ïa ngi ki nonghikai bad ka ban ktah ïa ka pule puthi ha ka Jylla ngin ïakhun katba lah la ka buit ka bor”.
Ha kaba ïadei ba ka la don ka jingkynnoh ba kane ka jingshim shuti ki nonghikai ka ktah ïa ki khynnah pule u la ong ba ki khynnah kim duhnong, hynrei kin ïoh jinghikai ba bha tam bad kata ka jinghikai ka long ba ngi dei ban ïakhun ïa ka jingshah ñion beiñ.
“Kane ka jingshah ñion beiñ, ki khana thok khana jler ka Sorkar ngi dei ban ïuh shapoh da ki jingshisha bad lada ka don ka jingpyrshang ban shna ïa kine ki khana thok ngin ïeng ban ïakhun da ka jingshisha” la ong u Babu Boswell.
Haba ïadei ka jingbymhun ïa ki mat jingdawa u Babu Boswell, u la ong ba ka shithi ba la ïoh pdiang ha ka miet jong ka 8 tarik Risaw kam shym la ai ïa ka jubab kaba hun halor ki mat kiba la pynpaw ha ka ‘Ultimatum’. U la kynnoh ruh ba ka Sorkar ka la pynleit jingmut ha ki mat kiba ym shym la buh ha ka ‘Ultimatum’, da kaba ïehnoh ïa ki jingdawa ba kongsan jong ki nonghikai.
Shuh-shuh u la kynnoh ba ka jingphah jingthoh biang ka Sorkar ha ka 13 tarik u Risaw ka dei ka jingleh buit-tuh ha kaba ka kynhun ka lap ïa kiba bun ki jingbymhun na katei ka shithi, u la kdew ïa ka jingleh buit-tuh ka jingong ba la pynlait ‘arrears’ lyngba katei ka jingthoh kam long kaba shai, hynrei u la pynshai ba katei kaba la ong ba la pynlait ka dei ka ‘Basic Pay’ jong ki kaba long tang 4% ïa kaba ki la dei ban ïoh naduh u bnai Rymphang jong u snem 2024 bad kyntait ba kam dei ka Dearness Allowance (DA) arrears.
