Nongstoiñ, Risaw 14
Hadien ka jingdon ki kynrum kynram hapdeng ka shnong Pyndengrei bad ka ophis FCI lem bad ka tnad PWD kaba la pynlong ïa ki paidbah ban duh khaw rashon mynta la kumba 3 bnai eiei namar ka jingbym shah shuh ka shnong ban ïaid ki kali heh shapoh ka kudam FCI, u Bah Methodius Dkhar, Myntri ka tnad Food Civil Supplies & Consumer Affairs ha ka sngi Balang u la lum ïa ka jingïalang hapoh ophis DC na ka bynta ban ïatai halor kumno ban weng ïa kitei ki jingeh.
Ha ka jingïalang la ïadon ryngkat lang u Bah Gabriel Wahlang, MLA ka Nongstoiñ, ka Hema Nayak, Deputy Commissioner ka WKHD, Bah Michael Marweiñ Sordar ka shnong Pyndengrei bad ki ophisar ka tnad FCI, Civil Supplies bad na ka tnad PWD.
U Bah Methodius Dkhar haba kren bad ki nongthoh khubor u la ong, ha kine ki khyndiat bnai bala dep kala don ka jingeh ba na ka liang jong ka shnong Pyndengrei ka ïakynduh kata ka dei halor ka jingsniew noh jong ka surok na Nongstoiñ Bypass ban wan sha kudam FCI kaba don hapoh ka shnong Pyndengrei namar ka jingïaid ki trok kiba heh kiba kynthup ïa ki trok 10 shaka shaneng kiba kit ïa u khaw.
U Bah Methodius u la ong, hadien ka jingïakren, ka tnad PWD kala kular ba kan nang ïai pynbha ïa ka surok lane ban nang pynheh kumba ka shnong kala pynpaw bad na ka liang jong ka shnong Pyndengrei ruh kila pdiang ïa ka jingïakren ha kaba naduh mynta ka sngi kan nym don shuh kano-kano ka jingeh ban pynpoi ïa u khaw hapoh ka kudam FCI kaba don hapoh ka shnong Pyndengrei.
U Sordar ka Shnong Pyndengrei Bah Michael Marweiñ u la ong, ka shnong Pyndengrei naduh u snem 2024 kala dep ai jingthoh sha u Myntri Rangbah ka Jylla ba un jngoh lem ïa katei ka surok kaba jngai tang kumba 160-meter na ka surok bah bad ka dei ruh kawei na ki surok kaba ju jia khah khah ka jingtwa khyndew ha kaba ka surok ka la sniew sha ba palat.
U Sordar u la ong ba ka shnong kam shym la ïoh satia kano-kano ka jubab dei tad haduh kane ka sngi ba u Bah Methodius Dkhar u la shim ïa ka jingkitkhlieh ban leh eiei haba ïadei bad katei ka surok, kumta ka jingïakren ka la poi sha ka jingmynjur lang ba yn plie noh ïa ka surok hynrei lada ki jingïakren kim urlong kumba la kular na ka liang jong ka shnong kan sa leh ïa kaba donkam.
U MLA ka Nongstoiñ Bah Gabriel Wahlang u la ong, “Nga la ïohi ïa ki khubor ha ki lad pathai khubor bad nga la pyrshang ban ïakren bad ka shnong hynrei ha ka jingïakren nga lap ba ka long da kumwei watla nga dei u MLA hynrei nga dei pat hi u nongshong shnong hapoh ka Pyndengrei bad ïa kaei kaba ka shnong ka shim ka dei ba kala don ka rai na ka dorbar”.
“Ha kane ka jingïalang ngi la ïakren ïa kiba bun ki jingdonkam jong ka shnong Pyndengrei bad khamtam ha kaba ïadei bad ka surok bad ki jingkynthoh kim long kiba dei namar ka shnong hi ka kwah ba ka surok kan long kaba bha bad kum u MLA ha ryngkat u Myntri ngi la bthah ïa ka tnad PWD ba kin nang shna ïa ka ‘estimate’ ba kin nang pynbha ïa ka surok,” u la ong.
