Shillong, Nohprah 06
U MLA ka BJP ha Meghalaya, Bah Sanbor Shullai, u la ong ba kam dei ban don ka jing-khang ban bam doh masi ha kane ka Jylla bad u la pynrem ruh ïa ka jingkhang bam doh masi da ka Sorkar BJP ha Assam.
Haba kren ha ka Sngi Thohdieng, u Bah Sanbor u la ong ba ka bam ka dih ka dei katkum ka jingsngew mon u briew shimet ban bam, ym dei ban khang satia.
U la ong ba u briew u lah ban bam doh bseiñ, doh ‘ñianglartham, doh ksew lane kino-kino kiba u sngew bang ban bam.
“Hangne ha Megha-laya ym lah ban pynbor ne khang ban bam, ka dei ka mon jong phi lada phi kwah bam doh bseiñ, doh masi ruh. Mynshwa la don u paralok jong nga ba wanrah doh ksew, ngi ïa bam lang bad i kurim ka bang bha”, la ong u Bah Sanbor.
Kane ka jingkren u Bah Sanbor ka long hadien ba ka Sorkar BJP ha Assam ka la khang ban bam doh masi ha baroh ki jaka paidbah kynthup ruh ha ki hotel bad restaurant ha katei ka jylla. U la ong ba hangne hapoh ka Jylla Meghalaya katba dang im u Bah Sanbor un ym shah satia ban khang bam doh masi.
“Nga don hangne kum u BJP Sanbor, ka BJP Assam ka ïapher ka rukom treikam bad ka BJP Meghalaya”, u la ong.
Katkum ka jingong u Bah Sanbor, ki briew sha Indonesia bad kiwei-kiwei ki ri, ki bam naphang ïa ki bseiñ, ki khnai, ki khñiang bad hangne ha ri India ruh ym dei ban khang ïa ka bam ka dih u briew.
Haba pynpaw ka jingpynrem bad ka jingpyrshah ïa ka rai jong ka Sorkar Assam ban khang bam doh masi, u Bah Sanbor Shullai u la ong ba u la dep pynkhreh lypa ban phah ïa kane ka khubor sha ka Sorkar Pdeng bad sha u Myntri Rangbah ka Assam, ba u pyrshah ïa kane ka rukom leh.
