Shillong, Nohprah 08
Ki ar ngut MDC ka Congress ki lah ban weng noh ïa ka jingkyrshan na ka Executive Committee (EC) kaba la lamkhmat da ka National People’s Party (NPP) ha Khasi Hills Autonomous District Council (KHADC).
Katkum ka tyllong khubor kaba la ïoh la ong ba ki ar ngut ki MDC ka Congress ba kynthup ïa u Bah Pynshngaiñ N Syiem uba dei ruh u Deputy Chief Executive Member ka KHADC bad u Bah Ronnie V Lyngdoh ki lah ban weng noh ïa ka jingkyrshan na ka EC ba la lamkhmat da ka NPP. Kane ka long hadien ba ka la jur bha ka jingpynbor na ka liang ki Nongïalam bad nongkitkam ka Congress ha Meghalaya haduh ba ki la phah syndon da ka jingthoh sha ka All India Congress Committee (AICC) ban phah tuklar halor kane bad ban bthah ïa kitei ar ngut MDC ba dei ban weng noh shi syndon ïa ka jingkyrshan.
Ha kine ki sngi ka la mih ka khubor ba ki Nongïalam ka Meghalaya Pradesh Congress Committee (MPCC) ki la pynbor ïa ki ar ngut MDC ka Congress kata ïa u Bah PN Syiem bad ïa u Bah Ronnie V Lyngdoh, uba dei ruh u MLA bad MDC ba mynta ka Mylliem ba kin weng noh ban ïatreilang bad ka National Peoples’ Party (NPP).
Ki khubor kiba ïajan ki ïathuh ba ki nongkitkam kiba hakhmat ka Congress naduh ki nongkitkam jong ki District bapher bapher kynthup ïa ki Mahila ki la phah syndon da ka jingthoh sha u Secretary ka AICC uba peit ïa ka Meghalaya u Chella Kumar ba kim sngewtynnad ba ki MDC ka Congress kin ïatreilang bad ka NPP ha KHADC.
Ha kane ka shithi kaba ki la phah ha ka 26 tarik Naiwieng 2024, la soi da u Bah Antonio War, President ka East Khasi Hills District Congress Committee, Bah Bormanding Nonglang, President West Khasi Hills District Congress Committee, Bah Alexander Kharsyntiew, President Eastern West Khasi Hills District Committee, Dr. Omarlin Kyndiah, President Shillong City Congress Committee, Bah MG Kharshanlor, President Ribhoi District Congress Committee, Bah Kynpham V Kharlyngdoh, President South West Khasi Hills District Congress Committee bad Kong Joplin Shylla kaba dei ka President Meghalaya Mahila Congress Committee.
Katkum ki khubor kiba tikna, ka jingpynbor ïa ki MDC ka Congress ban weng noh na ka Executive Committee ba la ïalam da ka NPP ka la long kaba jur bha. Katkum ka jingïoh jingtip ba tikna na ki nongïalam bad ki nongtrei jong ka Congress, kane ka jingpynbor ïa ki MDC ban weng noh ka jingkyrshan ka la sdang naduh ka 20 tarik u Nailur, 2024 ha ka jingïalang jong ka Congress kaba la long ha ka Congress Bhavan.
Ha katei ka jingïalang ha u Nailur, ki President jong ki Block, President ki District ki la pynbor ïa u Bah PN Syiem bad Bah RV Lyngdoh ba kin weng noh ban kyrshan ïa ka Executive Committee ba la ïalam da ka NPP bad ïoh jingkyrshan ruh na u President ka MPCC.
Ki la ong ruh ba namar ba ka ilekshon MDC sha ka KHADC ka lah ban long ha ka taïew balai u Rymphang 2025, kumta ka Congress kam dei ban ïatreilang bad ka NPP lane BJP.
Ha ka shithi ba la phah da ki Nongïalam Congress ha Meghalaya sha ka AICC, ki la kyrpad ba kan bthah ïa u Bah PN Syiem bad Bah RV Lyngdoh ba kin weng noh ïa ka jingkyrshan na ka NPP bad lada kim kohnguh ki dei ban ngat ha ka jingpynshitom.
La ong ba dei halor ka shithi ba la phah ha ka 26 tarik Naiwieng, 2024 ba u Dr. Chella Kumar, Secretary AICC bad u Anthony Matthew, Joint Secretary AICC kiba dei ban peit ïa ka Meghalaya ki la wan da lade ban ïakynduh ïa ki nongïalam bad ki dkhot jong ka seng ha ka 2 tarik Nohprah 2024.
Shuh shuh ki khubor ki ïathuh ba ki nongkitkam naduh ki President ki District, Mahila bad ki samla ki la pynpaw biang ïa kane ka juh ka sur sha kine ki nongïalam ka AICC kumba ki la ïakren ha ka 20 tarik Nailur 2024 ban pynbor phah weng noh ïa ki ar ngut ki MDC Congress ban ïatreilang bad ka NPP ha KHADC.
Katkum ka khubor ba tikna la sngewthuh ba ha kane ka jingïalang ki nongtrei jong ka seng ki la pynbor ïa ki in-charge ban tuklar noh sted ïa kane ka kam. Kane ka jingpynbor jong ki nongtrei ka seng ka la buh ïa u Bah PN Syiem bad Bah RV Lyngdoh ha ka jingeh, lehse dei halor kane ka jingwan jong ki in-charge kaba la pynlong ïa u Bah PN Syiem bad Bah RV Lyngdoh kiba dei ki MDC ban pyrkhat bniah biang halor ka jingïatreilang ha ka Executive Committee ba la lamkhmat da ka NPP. Lada kim shim ïa ka rai kham kloi katba lah, kan nangbuh shuh shuh ha ka jingeh ïa kine ar ngut ki rangbah khamtam ïa u Bah PN Syiem uba nang dei ban ïaleh na ka Congress. Ka khubor ba tikna ka ïathuh ba lehse tang khyndiat sngi kine ar ngut ki MDC kim banse ban sngap ïa ki nongtrei jong ka seng bad ïa ki Nongïalam jong ka Congress.
