Shillong, Nohprah 08
Ha ka jingpynkhreh ki seng saiñ-hima na ka bynta ka ilekshon MDC sha Khasi Hills Autonomous District Council (KHADC) bad Jaiñtia Hills Autonomous District Council (JHADC) ka ban long ha u snem ban wan, ka Indian National Congress (INC) ruh lyngba ki nongïalam bad nongkitkam ha ki Block Congress Committee bad ki Unit bapher bapher ka la sdang ïa ki jingtreikam bad jingpynkhreh bad shen kan sa pynbna ruh ïa ka thup kyrteng jong ki kyrtong ki ban ïa aireng.
Ha ka jingïaid shakhmat ka jingpynkhreh, ka East Khasi Hills District Congress Committee (EKHDCC) ha ka jingïalam u President, Bah Neil Antonio War, Kong Sonny Kharjana lem kiwei pat ki nongkitkam, dang shen ka la ïoh ban pynskhem ïa ki nongkitkam bathymmai jong ka Sohra Block Congress Committee ha ka jingïalang ba la pynlong ha Laitlyngkot.
Ïa ka kam President ka Sohra BCC la pynkhamti ha u Bah Rilang Nongkhlaw, u Bah B Vitus Rymmai kum u General Secretary, u Bah Alexson Diengdoh kum u Working President, u Bah Shaiborsing Dohling bad u Bah Shiningstar Kharakor kum ki Secretary, u Bah Donhok Riahtam kum u Treasurer, u Bah Sngewlang Shabong bad u Bah Welter Thabah kum ki Adviser, u Bah Pynbitlang Nongkhlaw, u Bah Bordon Nongbet kum ki dkhot lem kiwei kiwei pat.
Kane jingpynskhem ïa ki nongkitkam ba thymmai ka Sohra BCC ka long shi bynta ka jingïaid shakhmat ban pynkhreh ïa ka ilekshon MDC ban wan na ar tylli ki MDC Konstitwensi kata na Lyngkyrdem-Laitkroh bad Sohra ha kaba kiba don ki shnong kiba hap sha Sohra MLA Konstitwensi, Pynursla MLA Konstitwensi bad kiwei pat.
Kumba long haduh mynta ki don ar ngut ki rangbah kiba pynkhreh ban ïa aireng lyngba ka tiket Congress ha kane ka ilekshon MDC ban wan kata u Bah Rilang Nongkhlaw uba pynkhreh ïa aireng na Lyngkyrdem-Laitkroh MDC Konstitwensi bad u Bah B Vitus Rymmai na Sohra MDC Konstitwensi.
Ki dang don lai tylli ki seng saiñ-hima kiba la pynbna ïa kyrtong na kitei ki Konstitwensi kata ka National People’s Party (NPP), ka Voice of the People Party (VPP) bad ka Khun Hynñiewtrep National Awakening Movement (KHNAM). Ka NPP na Lyngkyrdem-Laitkroh kan pyn?akhun da u Bah Rahbok Tynsong katba na Sohra pat kan pyn?akhun da u Bah Donevan Kharwanlang, MDC barim uba la mih khmat mynshwa naduh u snem 2014-2019.
Ka VPP pat kan pynïakhun da u Bah Shemborlang Rynjah na Lyngkyrdem-Laitkroh bad u Bah John Thabah na Sohra. Katba na ka liang ka KHNAM ka la pynbna da u Bah Banplieborlang Mawroh ban ïa aireng na Lyngkyrdem-Laitkroh MDC Konstitwensi.
Ïa kine ki MDC Konstitwensi ïa mynta kata na Lyngkyrdem-Laitkroh dang mih khmat da u Bah Ryngkatlang Lyndem bad na Sohra pat da u Bah Titostarwell Chyne kiba dei jong ka United Democratic Party (UDP) kiba dang pynkhreh ruh ban ïa aireng ban shah jied biang ha ka ilekshon ban wan wat la ka UDP kam pat pynbna ïa ka thup kyrteng ki kyrtong.
Da ka jingdon ka Congress, ka seng saiñ-hima ba la rim ha ka Jylla, ka ban buh kyrtong na kine ar tylli ki MDC Konstitwensi, la khmih lynti ba ka jingïakhun kan long kaba itynnad bha khamtam kitei ki rangbah kiba pynkhreh kata u Bah Rilang bad u Bah B Vitus ki dei kiba la ïoh jingithuh bha da ki paidbah ha kitei ki thaiñ.
