Nongpoh Nohprah 08
Ka Congress lyngba ka Umsning Block Congress Committee (UBCC) ha ka jingïalang kaba la pynlong ha ka sngi Saitjaiñ ha Umsning Auditorium, ka la sei syndon da u Bah Rocky A Marweiñ kum u kyrtong jong ka seng ban ïakhun ïa ka ilekshon sha ka ïingdorbar jong ka Khasi Hills Autonomous District Council (KHADC) ka ban sa long ha u snem ban wan na Umsning konstitwensi.
Ha katei ka jingïalang kaba la pynlong da ka UBCC, la sakhi ïa ka jingdon ryngkat jong u Bah SW Rymbai, District Observer ka Congress, u Bah MG Kharshanlor, President ka Ri Bhoi District Congress Committee (RBDCC) nalor kiwei kiwei ki nongïalam ryngkat bad ki spah ngut ki paidbah nongkyrshan kiba la wan na kylleng jong ka konstitwensi.
Haba kren ha kane ka sngi, u Bah Rocky A Marweiñ u la pynpaw ïa ka jingsngewkmen ba ka Congress ka la ibit bad ai tiket ïa u ban ïakhun ïa ka ilekshon MDC la shem snem na Umsning konstitwensi bad kumba la sakhi ïa ka jingai jingkyrshan kaba pura jong ki paidbah, u don ïa ka jingkyrmen kaba skhem ban poi sha ka thong jong ka jingjop.
Shuh shuh, na ka liang jong u Bah Rocky lem bad kiwei nongïalam jong ka seng kiba la ai jingkren ha kane ka sngi, ki la buh thong ban dang ïai trei shitom ban pynsngewthuh bad pynïoh ïa ka jingkyrshan kaba pura jong baroh ki paidbah ka Umsning konstitwensi na ka bynta ban pynïoh ïa ka jingjop kaba donburom kumba ka seng hi ka dei kaba shakri bad peit khmat kyrpang ïa ka jingeh ka jong ki paidbah.
