Jowai, Nohprah 08
Ka Khooid Ya ka Wah Myntdu (KYM) ha ka jingïakhun ban pynneh, pynbha ïa ka Myntdu kaba dei tang ma ka kaba pynbiang umbam-umdih bad um rep um riang ïa ki nongshong shnong bad nongrep, ha ki khyndiat sngi ka la ïoh pdiang ïa ka jingujor ba don ka jingkhlong pathar ïa ki maw bad khyndew da ki JCB bad trok dumper na ka wah Mynkrem bad wah Myntdu, ha ka jingshna ïa ka Jowai Bypass narud ka Myntdu.
Ha ka kyrwoh ba la phah da u President ka Khooid Yaka wah Myntdu Khroo L Pariat, u la ong ka seng da ka jingsngewkhia halor kane, ka la hiar jurip da lade sha katei ka wah bad ka la lap ba ïa kitei ki maw bad khyndew la khlong beaiñ bad kaba pynkyndit shuh shuh ïa ka seng ba ïa kitei ki maw bad khyndew la pyndonkam ruh ban shna ïa ka Jowai Bypass.
U la ong kane ka jingleh pathar ka ophis u EE PWD (Roads) Jowai Central Division ka long kumba pynïap lypa ïa ka jingim ki briew bad ki dohum kiba thrang ban ïoh ïa ka um kaba khuid. Shuh shuh ka la long kumba la leh khnang ban pyrshah ïa ka hukum u DC West Jaiñtia Hills District, kumjuh ka hukum u CFO JHADC kaba la khang pyrshah ban khlong maw khlong shyiap na ka wah Myntdu khamtam da ki trok JCB bad dumper.
Shuh shuh u la ong kaba pynlyngngoh ba kumno ka PWD ka siang maw bad khyndew da kiba na ka wah Myntdu. Hato ïa katei ka surok kaba la shna da ki phew klur lah hi ban siang surok tang da ki maw ka khyndew na ka wah? Mano ban bahkhlieh lada ka um ba sam na PHE kan kylla khyndew bad ka wah Myntdu Mynkrem kin jah noh?
Namar kata, ka Khooid Yaka Wah Myntdu ka la kyrpad ïa u DC, u DFO, CFO ka JHADC, kumjuh ka Meghalaya State Pollution Control Board, Shillong ban pynshitom tyngeh ïa ki Engineer ka PWD (Roads) Jowai Central Division katkum ki aiñ ïada mariang, ïada um bad ïada wah.
Ha kane ka jingleit peit la don ryngkat ka Kong B Blah, MCS, ADC West Jaiñtia Hills District, u Bah H Nengnong EE PWD (Roads) Jowai Central Division, u H Passah na ka ophis CFO JHADC, bad ki ‘riew rangbah ka shnong Jowai.
