Shillong, Nohprah 08
U Bah PT Sawkmie, MLA barim u la pynpaw ba ha ki 52 snem ka jylla Meghalaya ka la ïaid, ha ka sien kaba nyngkong ba ki paidbah nong Mawlai ki la mad jingeh bha.
U la pynpaw bad khlei ïa kine ki kyntien ha ka jingrakhe ïa ka Advance Khristmas ba la pynlong da u Bah PT Sawkmie bad ka longïing ha ka jingdon ryngkat ki paidbah nong Mawlai ha ka prokram kaba la pynlong ha Indoor Sports Hall, Mawlai Phudmuri ha ka 7 tarik u Nohprah, 2024.
Ha kane ka jingrakhe la ïadon lang ki dkhot ka Dorbar Shnong Mawlai Phudmuri naduh u Rangbah Shnong Bah S Khongkliam bad kiwei, ki Phadar ka Mawlai Parish bad ki paidbah na ki dong bapher-bapher jong ka Mawlai Konstitwensi.
U la pynpaw kat shaba phai ki paidbah ka Mawlai Konstitwensi ki mad jingeh da ka jingud da ka jingnam, da ki jingjynjar bad jingshitom suda.
Kum u kpa trai, u ong ba u tip ïa ka duk ka suk jong ki paidbah. Namar kata, u la pynpaw ba ha kane ka kynti ba mynta ki paidbah nong Mawlai ki dei ban ïeng tylli ban wanrah ïa ka jingkylla.
Ha kajuh ka por u Bah Sawkmie u la ai khublei Khristmas bad snem thymmai basuk bad bakmen ïa baroh.
Ha kane ka sngi la ïoh ruh ïa ka jingkren na u Bah L Mylliem Umlong, uba la pynpaw ba ki paidbah nong Mawlai kim ju pynjop MDC na kajuh ka seng.
U la pynpaw ruh ba u sakhi ïa ka jingieit u Bah PT Sawkmie ban shakri, naduh ba u rem u khlem sangeh ka shakri ïa ki paidbah bad u ïai bteng tad haduh kine ki sngi.
