Shillong, Nohprah 08
U Symbud Myntri Rangbah ka Jylla bad uba dei khmih ruh ïa ka tnat Pynroi Sor, Bah Sniawbhalang Dhar, u la ong ba halor ka jingpynkynriah ïa ki nongshong die madan na Khyndailad, na ka liang ka Sorkar Jylla ka dang khmih sani bha bad baroh ki kam-ki jam ki dang don hapdeng ka jingïakren ban pyntyllun ïa ki kam shakhmat.
Haba kren ha ki katto-katne ngut ki lad pathai khubor ha ka sngi Saitjaiñ ka 7 tarik u Nohprah 2024, u Bah Sniawbhalang u la ong, “Ki nongshong die madan ki dei ki briew jong ngi hi bad kum ka Sorkar kan ym bret ïa ki kumto hynrei kan ïakren bad kan ïatreilang ryngkat bad ki ban pynïaid beit shakhmat ïa ki kam khnang ba yn lah pat ban buh ïa ki ha ka jaka kaba biang da kaba pynthikna pat ban ym lah ban pyndep ïa kane ka kam mynta u snem hynrei u kyrmen skhem ban lah leh ïa kane ha ka por kaba lyngkot.”
“Baroh ki kam ki dang don hapdeng ka jingïakren bad ngin ïatreilang ryngkat bad ki nongshong die madan. Ki dei ki briew jong ngi hi, kumta ngim dei ban bret ïa ki kumto hynrei ngin ïakren bha bad ki bad ngin sa buh ïa ki ha ka jaka kaba biang. Ngi kyrpad ïa ki wat la kin ym lah ban ïoh katba ki dawa hynrei ngin ïatreilang ryngkat bad nga kyrmen skhem ba ngin lah ban poi sha kaba ngi ïahun lang baroh,” bynrap u Bah Sniawbhalang.
Ha kaba ïadei pat halor ka jingleit jong u Myntri Rangbah ka Jylla sha nongbah Delhi, u Bah Sniawbhalang u la ong ba ka jingleit jong u Myntri Rangbah ka Jylla sha Delhi ka long ban leit ïakynduh bad ïakren bad ki Myntri ka Sorkar Pdeng ha kaba ïadei bad katto-katne tylli ki mat jong ka Jylla kaba kynthup ruh ïa ka jingdonkam ban ïoh ïa ka jaka ïada ri bad ban pynkynriah ïa ki nongshong shnong jong ka Harijan Colony na Them Ïewmawlong.
“Ngi kyrmen skhem ba ngin lah ban weng ïa ki jingeh baroh ha ka por kaba lyngkot”, ong u Bah Sniawbhalang.
