Shillong, Nohprah 08
Ka synjuk jong ki nongñiah kali Sorkar kaba la tip kum ka Meghalaya Government Driver’s Welfare Association (MGDWA) ka la pynlong ïa ka jingrakhe dap 50 snem bad pynkup burom ruh ïa ki nongtrei Sorkar kiba la ai ïa ka jingshakri ha ka kam da kaba ñiah kali.
Ha kane ka sngi la wan ban ïadonlang da u Symbud Myntri Rangbah ka Jylla uba dei peit ïa ka tnat Pynroi Sor u Bah Sniawbhalang Dhar kum u kongsan ha ryngkat ka jingïadonlang u Chief Secretary ka jylla u Bah Donald P Wahlang, ka DC ka East Khasi Hills ka Kong Rosetta M Kurbah, ki heh ophisar bad kiwei kiwei kiba la shah khot sngewbha.
Ha kane ka sngi ka la don ruh ka jingpyllait paidbah ïa ka kot sah kynmaw jong ka Synjuk lem bad ka jingpynkup burom ïa ki nongñiah kali kiba la shongthait na ka kam.
La pynshongshit ïa kane ka sngi lyngba ki jingrwai bad ki jingshad kiba la ïashimbynta da ki dkhot jong ka MGDWA.
U Chief Secretary ka Jylla, Bah Donald P Wahlang, IAS haba kren ha ka jingïalang pynkup burom jong ki nongñiah kali Sorkar kiba don hapoh ka lama jong ka MGDWA, u la pynpaw ka jingkhublei na ka bynta ki nongñiah kali kiba la shongthait wat la ki la don ki nongñiah kiba la ïoh ban ñiah kali ïa u kum u heh ophisar jong ka jylla ruh.
“Kim ju kham ïoh ïa ka nam hynrei ki dei ki briew kiba trei shitom bha ha ka ban leit buh ïa ngi ha ki kam-ki jam bad ki dei ki briew kiba thom ïa shibun ki jingeh bad ki jingïaleh”, ong u Bah DP Wahlang.
U CS u la ong, ha ka jingpynkut ïa ka jinglehkmen dap 50 snem ka seng jong kiba ñiah kali Sorkar, ka jingkynmaw burom kam dei tang na ka bynta ka samoi treikam kaba kum ki nongñiah kali ki la ai ha ki snem ba ki trei bad u la ong ba ki nongñiah kali ki la synñiang ïa ka bynta kaba donkam tam ha ka imlang ka sahlang kiba la kit halade ïa ka jingkitkhlieh ka jingaiti lut bad ka jinglah ban pynïadei.
U la ong ruh ba ki nongñiah kali Sorkar ki dei ki riewkhraw ki bym ju da kham ïoh ïa ka nam bad ka jingïaroh kiba thom bad ïaleh ïa ki jingeh khlem jingartatien namar ha man la ki surok ba ki ïaid ki wanrah ïa ka jingïadei bad ka jingsngewthuh ha ka imlang-ka sahlang bad u Bah Donald u la bynrap da kaba ong kumba ka seng ka la lehkmen ïa ka jingdap 50 snem, kane ka pyni ruh ïa ka jinglong janai ban long kita ki nongñiah kali kiba tbit.
